Rezidenturanı uğurla başa vuran həkim-mütəxəssislərin iş yerinə təyinatı zamanı nəzərə alınan meyarların dairəsi genişləndirilir.

Abatv.az xəbər verir ki, bununla bağlı Səhiyyə Nazirliyinin Kollegiyası müvafiq qərar qəbul edib.

Qərara əsasən, bundan sonra həkim-mütəxəssislərin təyinatı və iş yerinə göndərilməsi zamanı onların ailə vəzifələri də nəzərə alınacaq. Dəyişiklik rezidenturanı bitirən mütəxəssislərin sosial vəziyyətinin və ailə məsuliyyətlərinin qiymətləndirilməsinə imkan yaradacaq.

Hazırda qüvvədə olan qanunvericiliyə əsasən, həkim-mütəxəssislərin təyinatı barədə qərar qəbul edilərkən onların ailə vəziyyəti, daimi yaşayış yeri, eləcə də işə yönəldilməsi ilə bağlı klinik bazanın tövsiyəsi əsas meyarlar kimi nəzərə alınır.

Yeni qərarla "ailə vəzifələri" anlayışının da meyarlar sırasına əlavə edilməsi həkimlərin iş yerinə təyinatı prosesində daha çevik və fərdi yanaşmanın tətbiqinə şərait yaradacaq. Bununla da ailə məsuliyyətləri olan həkim-mütəxəssislərin iş yerlərinin müəyyənləşdirilməsi zamanı onların sosial vəziyyəti daha ətraflı qiymətləndiriləcək.