Bakı metropolitenində sərnişinlərin təhlükəsizliyinin daha yüksək səviyyədə təmin olunması məqsədilə platformalarda mühafizə sədlərinin quraşdırılması nəzərdə tutulur.

Abatv.az xəbər verir ki, bu barədə “Bakı Metropoliteni” Qapalı Səhmdar Cəmiyyətinin İctimaiyyətlə əlaqələr şöbəsinin müdiri Bəxtiyar Məmmədov açıqlama verib.

Onun sözlərinə görə, platformalarda mühafizə sədlərinin quraşdırılması hazırkı mərhələdə texniki baxımdan mümkün deyil. Buna səbəb metropolitendə müxtəlif tipli qatarların istismar olunması və onların qapılarının ölçülərinin eyni olmamasıdır.

B.Məmmədov bildirib ki, qatar parkının yenilənməsi və hərəkət sistemlərinin tamamilə müasirləşdirilməsindən sonra bu layihənin icrası daha asan olacaq:

“2030-cu ilə qədər yeni sistem quraşdırıldıqdan sonra bu prosesə start verilə bilər. Burada təkcə hərəkət sistemi deyil, stansiyaların quruluşundan, havalandırma sistemindən tutmuş vaqon tiplərinə qədər bir sıra məsələlərin həlli vacibdir”.

Qeyd olunub ki, platformalarda mühafizə sədlərinin quraşdırılması sərnişinlərin qatar yoluna düşməsi, telefon və digər şəxsi əşyaların relslərin üzərinə düşməsi, eləcə də intihar hallarının qarşısının alınmasına mühüm töhfə verə bilər.

Məlumata görə, 2030-cu ilə qədər Bakı metrosunda 9 yeni stansiyanın tikilib istifadəyə verilməsi, həmçinin 300 yeni vaqonun alınması planlaşdırılır. Qatar parkının əsasən yenilənməsi ilə yanaşı, mövcud xətlərdə müasir hərəkət sistemlərinin tətbiqi də nəzərdə tutulur.

Bütün bu yeniliklərin həyata keçirilməsindən sonra metro stansiyalarında platforma mühafizə sədlərinin quraşdırılması üçün daha əlverişli texniki imkanların yaranacağı gözlənilir.