Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura ikigünlük səfəri davam edir.

Abatv.az xəbər verir ki, səfərdə 58 ölkə və 9 beynəlxalq təşkilatı təmsil edən 150 nümayəndə iştirak edir. Diplomatları Azərbaycan Respublikası Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev müşayiət edir.

Səfər çərçivəsində diplomatik korpusun nümayəndələri Xankəndi və Şuşa şəhərlərində müxtəlif obyektlərə baş çəkib, regionda həyata keçirilən bərpa-quruculuq və inkişaf layihələri ilə tanış olublar.

Diplomatlar Xankəndidə Zəfər parkını, Mədəniyyət Mərkəzini, Dəmir Yolu və Avtovağzal Kompleksində aparılan tikinti işlərini ziyarət edib, həmçinin Qarabağ Universitetinin fəaliyyəti ilə tanış olublar. Qonaqlara bölgədə həyata keçirilən layihələr və görülən işlər barədə ətraflı məlumat verilib.

Səfərin davamında nümayəndə heyəti Xankəndidə “AzCotton” MMC-nin tikiş fabrikinə baş çəkərək istehsal prosesi ilə tanış olub.

Şuşada isə diplomatlar Cıdır düzündə olublar. Onlara ərazinin tarixi-mədəni əhəmiyyəti barədə məlumat verilib. ABŞ-də 11 sentyabr terror aktlarının 25-ci ildönümü ilə əlaqədar Cıdır düzündə terror qurbanlarının xatirəsi bir dəqiqəlik sükutla yad edilib.

Xarici diplomatlar həmçinin Şuşadakı yeni məscidin tikintisi ilə tanış olub, Yuxarı Gövhər ağa məscidini ziyarət ediblər. Müsəlman ölkələrindən olan diplomatlar məsciddə namaz qılıblar.

Nümayəndə heyəti Qarabağ küçəsində və “Sadıqcanın evi”ndə də olub. Qonaqlar Şuşanın tarixi-memarlıq irsi ilə tanış olublar.

Daha sonra diplomatlar Şuşanın Birinci yaşayış məhəlləsini ziyarət edərək burada aparılan bərpa-tikinti işləri ilə tanış olublar. Qonaqlara məhəllədə yaradılmış şərait və həyata keçirilən layihələr barədə məlumat verilib.

Qeyd edək ki, bu, diplomatik korpus nümayəndələrinin 2020-ci ildən etibarən işğaldan azad edilmiş ərazilərə sayca 22-ci səfəridir.