“İmtahan haqqında danışarkən biz daha çox suallar, nəticələr, ballar və statistikadan danışırıq. Amma hər imtahan minlərlə fərqli insan və fərqli həyat şəraiti deməkdir”.

Abatv.az xəbər verir ki, bunu Dövlət İmtahan Mərkəzinin (DİM) İdarə Heyətinin sədri Məleykə Abbaszadə sosial media hesabında paylaşdığı açıqlamada bildirib.

DİM sədri qeyd edib ki, ədalətli qiymətləndirmənin əsas prinsiplərindən biri imtahan iştirakçısının sağlamlıq imkanlarının onun bilik və bacarıqlarını nümayiş etdirməsinə mane olmamasıdır.

Onun sözlərinə görə, bunun üçün ehtiyacdan asılı olaraq imtahan zalının dəyişdirilməsi, əlavə vaxt verilməsi, xüsusi təlim keçmiş nəzarətçinin ayrılması, surdoköməkçinin cəlb edilməsi, dinləmə tapşırıqlarının alternativ tapşırıqlarla əvəzlənməsi, xüsusi stol-stul hazırlanması və zəruri tibbi cihazların imtahana gətirilməsinə şərait yaradılması kimi tədbirlər görülür.

“Çünki bərabərlik hər kəsə eyni şeyi vermək deyil. Bu, hər kəsin öz biliyini bərabər şərtlərlə nümayiş etdirə bilməsi üçün ehtiyac duyduğu şəraiti yaratmaqdır”, – deyə Məleykə Abbaszadə vurğulayıb.

Bildirilib ki, bu yanaşma DİM tərəfindən uzun illərdir tətbiq olunur. 2016-cı ildə sağlamlıq imkanları məhdud və ya inklüziv təhsil alan 132 iştirakçı üçün xüsusi imtahan şəraiti yaradıldığı halda, 2026-cı ildə bu göstərici 929 nəfərə çatıb.

Təkcə 2026-cı ildə 505 nəfər DİM-ə əvvəlcədən müraciət edərək fərdi ehtiyaclarına uyğun xüsusi imtahan şəraitinin yaradılmasını xahiş edib.

Bundan əlavə, ixtisaslaşmış xüsusi internat məktəblərinin buraxılış siniflərində təhsil alan 274 şagird üçün imtahanların onların təhsil aldıqları müəssisələrdə, zəruri şərait yaradılmaqla keçirildiyi bildirilib.

DİM sədrinin sözlərinə görə, xüsusi şərait hər bir iştirakçının fərdi ehtiyacına uyğun müəyyənləşdirilir. Görmə məhdudiyyəti olan şəxslər üçün xüsusi təlim keçmiş nəzarətçi ayrılır, I qrup gözdən əlillərə əlavə vaxt verilir və vizual tapşırıqlar onların imkanlarına uyğunlaşdırılır.

Eşitmə pozuntusu olan iştirakçılar üçün zərurət yarandıqda surdoköməkçi cəlb olunur, xarici dil üzrə dinləmə mətnləri isə yazılı tapşırıqlarla əvəz edilir. Hərəkət məhdudiyyəti olan şəxslər üçün uyğun bina, mərtəbə və xüsusi stol-stul seçilir.

Həmçinin zəruri hallarda eşitmə cihazı, lupa, şəkər pompası və digər tibbi vasitələrdən istifadəyə icazə verilir.

Məleykə Abbaszadə vurğulayıb ki, imtahan nəticələri bütün iştirakçılar üçün eyni meyarlarla müəyyənləşdirilir:

“Biz isə həmin nəticəyə gedən yolda heç kimin qarşısında maneə qalmamasına çalışırıq”.