Hazırda Xankəndi şəhərində 28 mindən çox insan yaşayır.

Abatv.az xəbər verir ki, bunu Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov Azərbaycanda akkreditə olunmuş diplomatik korpusun nümayəndələri ilə Xankəndi Mədəniyyət Mərkəzində keçirilən görüşdə deyib.

Xüsusi nümayəndənin sözlərinə görə, şəhərdə dövlət və özəl sektorda çalışan şəxslərlə yanaşı, tələbələr və “Böyük Qayıdış” proqramı çərçivəsində mərhələli şəkildə doğma yurdlarına qayıdan ailələr yaşayır.

Elçin Yusubov bildirib ki, Xankəndi şəhərinin və Kərkicahan qəsəbəsinin sakinlərinin doğma torpaqlarına qayıdışı mərhələli şəkildə davam edir. Kərkicahan qəsəbəsində yaşayış evlərinin bərpası ilə yanaşı, Xankəndidə yeni yollar salınır, binalar yenidən qurulur və müasir infrastruktur yaradılır.

Hazırda şəhərdə 3 mindən çox tələbənin təhsil aldığı bildirilib. Qeyd olunub ki, tələbələr Xankəndi əhalisinin təxminən 10 faizini təşkil edir.

Bildirilib ki, şəhərdə aparılan bütün tikinti və abadlıq işləri Xankəndinin Baş Planına uyğun həyata keçirilir. Şəhərin ümumi memarlıq görünüşünə uyğun olmayan tikililər sökülür, onların yerində müasir tələblərə cavab verən yeni binalar və obyektlər inşa olunur.

E.Yusubov vurğulayıb ki, hazırda Xankəndidə bir sıra iri layihələr icra edilir. Görülən işlər nəticəsində şəhərin infrastrukturu yenilənir, yeni yaşayış və ictimai məkanlar yaradılır, sakinlərin rahat və təhlükəsiz yaşaması üçün əlverişli şərait formalaşdırılır.

Həyata keçirilən genişmiqyaslı bərpa-quruculuq layihələri nəticəsində Xankəndinin müasir görkəm aldığı və şəhərin yeni inkişaf mərhələsinə qədəm qoyduğu qeyd olunub.

Abatv.az