İşğaldan azad edilmiş ərazilərdə məcburi köçkünlərin daimi məskunlaşmasını təmin etmək məqsədilə Daimi Məskunlaşma Fondu yaradılacaq.

Abatv.az xəbər verir ki, bu, Prezident İlham Əliyevin təsdiqlədiyi "Qaçqınların və məcburi köçkünlərin (ölkə daxilində köçürülmüş şəxslərin) statusu haqqında" qanuna edilən dəyişiklikdə öz əksini tapıb.

Dəyişikliyə əsasən, yaradılacaq fondun yaşayış sahələri xüsusi təyinatlı mənzil fondunun yaşayış sahələri sırasına daxil ediləcək. Həmin mənzillər məcburi köçkünlərin işğaldan azad edilmiş ərazilərdə daimi yaşayış yerləri ilə təmin olunması və sonradan onların mülkiyyətinə verilməsi üçün nəzərdə tutulub.

Qanuna əsasən, məcburi köçkünlərin fondun yaşayış sahələrinə köçürülməsi, eləcə də həmin mənzillərin onların mülkiyyətinə verilməsi qaydası müvafiq icra hakimiyyəti orqanının müəyyən etdiyi qurum tərəfindən təsdiq ediləcək.

Qeyd edək ki, qəbul edilən dəyişikliklər işğaldan azad olunmuş ərazilərdə məcburi köçkünlərin dayanıqlı məskunlaşmasının təmin edilməsi və onların mənzil təminatının hüquqi əsaslarının daha da təkmilləşdirilməsi məqsədi daşıyır.