Gəncə şəhərinin bir sıra ərazilərində qaz təchizatı müvəqqəti olaraq məhdudlaşdırılıb.

ABATV.az xəbər verir ki, bu barədə “Azəriqaz” İstehsalat Birliyi məlumat yayıb.

Bildirilib ki, sentyabrın 12-də şəhərin Avtovağzal ərazisinə yaxın hissəsində yerləşən tuneldə yüksəkgərginlikli elektrik naqillərində və onların üzərindəki şitdə yanğın baş verib.

Texniki təhlükəsizlik tədbirləri çərçivəsində “Avtozavod”, “Sənaye” və “Şəhər-1” ortatəzyiqli qaz xətlərindən qaz təchizatı məhdudlaşdırılıb.

Məlumata görə, tuneldə yanğın tam söndürüldükdən sonra hadisə şəraiti qiymətləndiriləcək və qaz təchizatının bərpası üçün zəruri maddi-texniki və əmək resursları hadisə yerinə cəlb olunacaq.