Azərbaycan Dövlət Su Ehtiyatları Agentliyinin (ADSEA) tabeliyində fəaliyyət göstərən Zaqatala Su Meliorasiya Sistemlərinin İstismarı İdarəsi rayon ərazisindən axan dağ çaylarında sel və daşqın təhlükəsinin qarşısının alınması istiqamətində zəruri tədbirləri davam etdirir.

Abatv.az xəbər verir ki, bu barədə ADSEA məlumat yayıb.

Bildirilib ki, hazırda Talaçayın sağ və sol sahillərində Yuxarı Tala, Aşağı Tala, Göyəm, Dardoqqaz, Höytala və Yolayrıc kəndləri ərazilərində sahilbərkitmə işləri aparılır. Eyni zamanda, Muxaxçayda Yuxarı Çardaxlar, Mamrux, Zəyəm, Çobankol və Suvagil kəndləri, Katexçayın sol sahilində Paşan kəndi, həmçinin Bəkməzçayda Car və Axaxdərə kəndləri ərazilərində daşqın riski yüksək olan sahələrdə məcratəmizləmə və sahilbərkitmə tədbirləri həyata keçirilir.

Qeyd olunub ki, görülən işlərin əsas məqsədi yaşayış məntəqələrinin, kənd təsərrüfatı sahələrinin və mühəndis-kommunikasiya infrastrukturunun sel və daşqın sularının yaratdığı təhlükələrdən etibarlı şəkildə qorunmasını təmin etməkdir.

Məlumata görə, Zaqatala Su Meliorasiya Sistemlərinin İstismarı İdarəsi əkin sahələrinin suvarılması və selə qarşı mübarizə tədbirləri ilə yanaşı, rayon əhalisinin keyfiyyətli içməli su ilə təminatını da həyata keçirir. Bu istiqamətdə şəhər ərazisində mütəmadi işlər görülür, baş verən qəzalar operativ şəkildə aradan qaldırılır.

Bildirilib ki, son günlər yağan intensiv yağışlar nəticəsində çaylardan gələn sel suları içməli su mənbələrində müəyyən fəsadlar yaradıb. Hazırda həmin problemlərin aradan qaldırılması istiqamətində zəruri tədbirlər görülür.

Xatırladaq ki, iyul ayının əvvəlində ölkənin şimal-qərb bölgəsində yağan güclü leysan yağışları nəticəsində dağ çaylarından sel keçmişdi. Həmin vaxt Azərbaycan Dövlət Su Ehtiyatları Agentliyi tərəfindən təxirəsalınmaz tədbirlər görülmüş, çaylara ağır texnikalar cəlb edilmişdi. Hazırda isə rayon ərazisindən axan bütün dağ çaylarında vəziyyət nəzarətdə saxlanılır.