Bakıda anasının imtina etdiyi körpənin səhhəti ilə bağlı yeni təfərrüatlar məlum olub.

Abatv.az-ın əldə etdiyi məlumata görə, iyunun 27-də dünyaya gələn körpənin yalnız qollarında deyil, ayaqlarında da inkişaf qüsurları müşahidə olunub. Bundan əlavə, uşağın barmaqlarının bitişik olduğu bildirilib.

Məlumata əsasən, körpədə ümumilikdə bir neçə anadangəlmə fiziki inkişaf qüsuru aşkarlanıb.

Qeyd edək ki, körpə iyunun 27-də Sabunçu Tibb Mərkəzində 36 həftəlik hamiləlikdən sonra qeysəriyyə əməliyyatı ilə dünyaya gəlib. Doğuş zamanı onun çəkisi 2 kiloqram 600 qram, boyu isə 47 santimetr olub.

Rəsmi açıqlamada körpənin “çoxsaylı inkişaf qüsurları ilə” doğulduğu bildirilib.

Məlumata görə, ana müalicə və müşahidə mərhələsindən keçdikdən sonra iyunun 30-da yazılı iltizamnamə ilə övladından imtina edib.

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyindən məsələ ilə bağlı verilən məlumata görə, uşağın anası tərəfindən tərk edilməsi barədə məlumat daxil olduqdan dərhal sonra qurumun əməkdaşları prosesə cəlb olunublar.

Agentliyin məlumatında bildirilib ki, uşağın səhiyyə müəssisəsindəki vəziyyəti qiymətləndirilib və onun daimi qayğı ilə təmin olunması məqsədilə qanunvericiliyin tələblərinə uyğun olaraq 1 nömrəli körpələr evinə yerləşdirilməsi həyata keçirilib.

Qurumdan əlavə edilib ki, körpənin vəziyyəti bundan sonra da mütəmadi olaraq diqqətdə saxlanılacaq.