Ümumi (9 illik) orta təhsil bazasında orta ixtisas təhsili müəssisələrinin boş qalan plan yerlərinə ixtisas seçimi bu gün, sentyabrın 10-da saat 23:59-da başa çatacaq.

Abatv.az xəbər verir ki, bu barədə Dövlət İmtahan Mərkəzi (DİM) məlumat yayıb.

Bildirilib ki, ixtisas seçmək hüququ olan abituriyentlər dövlət hesabına və ödənişli əsaslarla olan yerlər üzrə 12-dək ixtisas kodu seçə bilərlər.

Bunun üçün abituriyentlər DİM-in elektron xidmət portalında yerləşdirilən “Abituriyentin elektron ixtisas seçimi ərizəsi”ni doldurmalı və təsdiqləməlidirlər.

Müsabiqədə yalnız ərizəsini elektron qaydada təsdiq etmiş abituriyentlər iştirak edə biləcəklər.

Boş qalan plan yerlərinin siyahısı “Abituriyent” jurnalının xüsusi buraxılışında təqdim olunub. Jurnalı DİM-in əsas inzibati binasından, “Abituriyent” satış məntəqəsindən və kitab mağazalarından əldə etmək, həmçinin www.abiturient.az saytı və Wolt tətbiqi vasitəsilə sifariş etmək mümkündür.

Jurnalın elektron versiyasını isə PDF formatında “Abituriyent” saytında ödəniş etməklə əldə etmək mümkündür.

Qeyd: İxtisas seçimi üçün son tarix bu gün saat 23:59-dur.