ABŞ İraq və İordaniyada hərbçilərinin həlak olmasından sonra İranla genişmiqyaslı müharibənin başlanmasına bir addım daha yaxınlaşıb.

Bu barədə "The Washington Post" qəzeti amerikalı rəsmiyə istinadən məlumat yayıb.

Məlumata görə, Pentaqon Yaxın Şərqdə hərbi aviasiyanın sayını artırmağa başlayıb. Bununla yanaşı, hava hücumundan müdafiə sistemləri və uzaqmənzilli raket ehtiyatlarının azalması, eləcə də döyüş zədələri səbəbindən bölgəyə əlavə qüvvə və təyyarələrin göndərilməsi imkanlarının məhdudlaşdığı bildirilir.

Nəşrin həmsöhbəti qeyd edib ki, ABŞ-nin hazırkı resursları genişmiqyaslı hərbi əməliyyatları təhlükəsiz şəkildə həyata keçirmək üçün kifayət etmir.

Xatırladaq ki, ABŞ və İran arasında gərginlik iyulun 8-də yenidən artıb. Vaşinqtonla Tehran arasında memorandum imzalandıqdan sonra ABŞ Silahlı Qüvvələri Hörmüz boğazında ticarət gəmisinə edilən hücuma cavab olaraq İran ərazisində bir neçə hədəfə zərbələr endirib.

Həmin gün ABŞ Prezidenti Donald Tramp İranla atəşkəsin başa çatdığını bəyan edib. Buna cavab olaraq Tehran Bəhreyn, İordaniya, Qətər, Küveyt, Birləşmiş Ərəb Əmirlikləri və Omanda yerləşən ABŞ obyektlərinə zərbələr endirməyə başlayıb.