İran Prezidenti Məsud Pezeşkian ölkənin Ali lideri Müctəba Xamenei ilə son görüşü barədə açıqlama verib.

ABATV.az xəbər verir ki, Pezeşkian bu barədə İran dövlət televiziyasına müsahibəsində danışıb.

Prezidentin sözlərinə görə, görüş təxminən yeddi saat davam edib və bu müddət ərzində ölkənin bütün aktual məsələləri ətrafında geniş müzakirələr aparılıb.

Pezeşkian Müctəba Xameneinin fiziki cəhətdən tam sağlam olduğunu bildirib.

Görüş zamanı əhalinin sosial vəziyyəti, dolanışıq problemləri, məşğulluq və mənzil təminatı, həmçinin sanksiyaların ölkəyə yaratdığı çətinliklər müzakirə olunub. Bundan əlavə, hökumətin və xalqın mövqeyi, ictimai dəstək, birlik və həmrəylik məsələləri də diqqət mərkəzində olub.

İran Prezidenti bildirib ki, Müctəba Xamenei düşmənin əsas məqsədinin ölkədə nifaq və fikir ayrılığı yaratmaq olduğunu vurğulayıb. Bu səbəbdən cəmiyyətdə birliyi və həmrəyliyi poza biləcək ifadələrdən çəkinməyin vacibliyi qeyd edilib.

Pezeşkian müsahibəsinin sonunda İran xalqına müraciət edərək deyib:

“Əziz İran xalqı! Əgər çətinliklər zamanı hər hansı səhlənkarlıq və çatışmazlıq görürsünüzsə, bilin ki, biz buna görə xəcalət çəkirik və bütün varlığımızla sizin xidmətinizdəyik”.