ABŞ Prezidenti Donald Tramp Kanada hökumətini meşə yanğınlarının qarşısının alınması üçün zəruri tədbirləri görməməkdə ittiham edib. O bildirib ki, bu vəziyyət ABŞ iqtisadiyyatına hər il milyardlarla dollar ziyan vurur.

Abatv.az xəbər verir ki, Donald Tramp bununla bağlı "Truth Social" sosial platformasında paylaşım edib.

Məlumata görə, Kanadada baş verən genişmiqyaslı meşə yanğınlarından yaranan tüstü ABŞ ərazisinə yayılıb. Tüstü Vaşinqton, Nyu-York, Boston və digər iri şəhərlərdə də müşahidə olunub.

Tramp paylaşımında bildirib ki, Kanada meşələrin idarə olunması və meşə tullantılarının təmizlənməsi istiqamətində lazımi addımları atmır.

"Kanada meşələrin elementar idarə olunması və meşə tullantılarının təmizlənməsi ilə məşğul olmaqdan imtina edir. Onlar bilirlər ki, bu cür imtina məhz belə nəticəyə gətirib çıxaracaq. Bu, hər il baş verən və ABŞ-yə milyardlarla dollara başa gələn qəsdən səhlənkarlıqdır", – deyə ABŞ prezidenti qeyd edib.

Donald Tramp əlavə edib ki, Kanadadakı meşə yanğınlarından ABŞ-yə dəyən zərər Ottavanın hazırda ödədiyi idxal rüsumlarına əlavə edilməlidir.