2 Avqust – Azərbaycan Kinosu Günü münasibətilə Daşkəsən rayonunda ilk dəfə açıq hava şəraitində milli kino nümayişi keçirilib.

Abatv.az xəbər verir ki, tədbir "AzerGold" QSC və Bakı Media Mərkəzinin birgə təşkilatçılığı, Daşkəsən Rayon İcra Hakimiyyətinin dəstəyi ilə baş tutub.

Tədbir çərçivəsində Bakı Media Mərkəzinin istehsalı olan "Tağıyev: Neft" tammetrajlı bədii filmi nümayiş etdirilib. Tarixi bioqrafik dram janrında ekranlaşdırılan filmin baş prodüseri Arzu Əliyeva, rejissoru isə Zaur Qasımlıdır.

Film böyük xeyriyyəçi və görkəmli sahibkar Hacı Zeynalabdin Tağıyevin həyat və fəaliyyətindən bəhs edir. Dördhissəli layihənin ilk filmi olan "Tağıyev: Neft"də onun neft sənayesindəki fəaliyyəti, sahibkarlıq yolu və Azərbaycanın inkişafı naminə gördüyü işlər bədii şəkildə təqdim olunub.

Qeyd edək ki, "Tağıyev: Neft" filmi Azərbaycanın 98-ci "Oskar" mükafatlarında "Ən yaxşı beynəlxalq tammetrajlı film" nominasiyası üzrə rəsmi namizədi kimi irəli sürülüb.

Daşkəsən rayonunun Xoşbulaq kəndində yerləşən Gənclərin Təlim və İstirahət Mərkəzinin ərazisində xüsusi quraşdırılmış açıq hava kinoteatrında keçirilən nümayişi 600-dən çox tamaşaçı izləyib. Tədbir iştirakçılar tərəfindən böyük maraq və rəğbətlə qarşılanıb.