Azərbaycan Prezidenti İlham Əliyevin Almaniyaya rəsmi səfəri iki ölkə arasında siyasi dialoqun dərinləşdirilməsi, iqtisadi əməkdaşlığın genişləndirilməsi və yeni strateji tərəfdaşlıq istiqamətlərinin müəyyənləşdirilməsi baxımından mühüm diplomatik hadisə kimi qiymətləndirilir.

Milli Məclisin deputatı Səbinə Salmanova bildirib ki, Avropa İttifaqının aparıcı siyasi və iqtisadi gücü olan Almaniya ilə münasibətlərin inkişafı Azərbaycanın balanslaşdırılmış və praqmatik xarici siyasət kursunun əsas istiqamətlərindən biridir.

Deputatın sözlərinə görə, Prezident İlham Əliyevin rəhbərliyi ilə həyata keçirilən müstəqil xarici siyasət nəticəsində Azərbaycan beynəlxalq münasibətlər sistemində etibarlı tərəfdaş və mühüm geosiyasi aktor kimi qəbul edilir. Bu gün ölkəmiz Avropa ilə Asiya arasında enerji, nəqliyyat və iqtisadi əlaqələrin inkişafında mühüm rol oynayır, Almaniya isə Avropanın aparıcı iqtisadi gücü kimi bu əməkdaşlıqda xüsusi əhəmiyyət daşıyır.

Səbinə Salmanova qeyd edib ki, Azərbaycan ilə Almaniya arasında diplomatik münasibətlər qarşılıqlı hörmət və etimada əsaslanır. Yüksək səviyyəli siyasi dialoq, parlamentlərarası əlaqələr, iqtisadi əməkdaşlıq və humanitar layihələr münasibətlərin möhkəm təməl üzərində qurulduğunu göstərir. Prezident İlham Əliyevin Almaniyaya səfəri isə bu əməkdaşlığın yeni mərhələyə keçməsi üçün geniş imkanlar yaradır.

Deputat vurğulayıb ki, son illərdə qlobal enerji təhlükəsizliyinin aktuallaşması Azərbaycanın beynəlxalq əhəmiyyətini daha da artırıb. Cənub Qaz Dəhlizi vasitəsilə Avropaya qaz ixrac edən Azərbaycan etibarlı enerji təchizatçısı kimi mövqeyini möhkəmləndirib.

Onun sözlərinə görə, Almaniyanın alternativ enerji və yaşıl texnologiyalar sahəsində zəngin təcrübəsi, Azərbaycanın isə bərpaolunan enerji potensialı gələcək əməkdaşlığın əsas istiqamətlərindən biridir. Qarabağ və Şərqi Zəngəzurun "yaşıl enerji zonası" elan olunması, günəş və külək enerjisi layihələri, eləcə də yaşıl hidrogen istehsalı sahəsində perspektivlər iki ölkə arasında strateji əməkdaşlığa yeni məzmun qazandırır.

Səbinə Salmanova bildirib ki, iqtisadi əməkdaşlıq Azərbaycan–Almaniya münasibətlərinin əsas sütunlarından biri olaraq qalır. Almaniya Azərbaycanın Avropadakı aparıcı ticarət tərəfdaşlarından biridir və alman şirkətləri ölkəmizdə sənaye, logistika, tikinti, kənd təsərrüfatı və xidmət sektorlarında uğurla fəaliyyət göstərirlər.

Deputat qeyd edib ki, Azərbaycanda həyata keçirilən iqtisadi islahatlar, sənaye parklarının yaradılması, qeyri-neft sektorunun inkişafı və investisiya mühitinin yaxşılaşdırılması Almaniya biznes dairələri üçün yeni imkanlar açır. Almaniyanın qabaqcıl texnologiyalarının və innovativ idarəetmə təcrübəsinin bu proseslərə cəlb olunması hər iki ölkə üçün qarşılıqlı faydalı nəticələr vəd edir.

O, həmçinin nəqliyyat və logistika sahəsində əməkdaşlığın xüsusi əhəmiyyət daşıdığını vurğulayıb. Bildirib ki, Bakı Beynəlxalq Dəniz Ticarət Limanı, Bakı–Tbilisi–Qars dəmir yolu və Orta Dəhliz layihəsi Azərbaycanın Avropa ilə Asiya arasında əsas logistika mərkəzlərindən birinə çevrilməsinə şərait yaradıb. Bu imkanlar Almaniyanın ixracyönümlü iqtisadiyyatı üçün də böyük maraq doğurur.

Deputatın fikrincə, Prezident İlham Əliyevin Almaniyaya səfəri regional təhlükəsizlik və sülh gündəliyi baxımından da mühüm əhəmiyyət kəsb edir. Azərbaycan beynəlxalq hüquqa əsaslanan mövqeyi, regionda davamlı sülhün təmin olunması istiqamətində həyata keçirdiyi siyasət və kommunikasiyaların açılması təşəbbüsləri ilə beynəlxalq tərəfdaşların etimadını qazanıb.

Səbinə Salmanova humanitar əməkdaşlığın da münasibətlərin ayrılmaz hissəsi olduğunu bildirib. Təhsil, elm, mədəniyyət, gənclər siyasəti, akademik mübadilə proqramları, rəqəmsal transformasiya, süni intellekt, innovasiya və kibertəhlükəsizlik sahələrində əməkdaşlığın gələcək illərdə daha da genişlənəcəyini qeyd edib.

Deputat sonda vurğulayıb ki, Prezident İlham Əliyev və Almaniya Kansleri Fridrix Merts tərəfindən imzalanan "Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə" iki ölkə arasında münasibətlərin inkişafında yeni mərhələnin başlanğıcını qoyur.

Onun sözlərinə görə, sənəd siyasi dialoq, iqtisadiyyat, enerji, nəqliyyat, innovasiya, elm, təhsil və humanitar sahələr üzrə əməkdaşlığın sistemli şəkildə inkişafına möhkəm hüquqi və institusional baza yaradır. Bu baxımdan Prezident İlham Əliyevin Almaniyaya səfəri Azərbaycanın beynəlxalq nüfuzunun daha da möhkəmlənməsinə və yeni əməkdaşlıq imkanlarının formalaşmasına mühüm töhfə verəcək.