Avqustun 8-də Ermənistan Respublikasının baş naziri Nikol Paşinyan Azərbaycan Respublikasının Prezidenti İlham Əliyevə telefonla zəng edib.

Abatv.az xəbər verir ki, bu barədə Azərbaycan Prezidentinin Mətbuat Xidməti məlumat yayıb.

Telefon danışığı zamanı tərəflər ABŞ Prezidenti Donald Trampın dəstəyi ilə 2025-ci il avqustun 8-də Vaşinqtonda keçirilmiş və Azərbaycanla Ermənistan arasında sülhün bərqərar olmasına mühüm zəmin yaratmış Sülh Sammitinin birinci ildönümü, həmçinin Azərbaycan Respublikası ilə Ermənistan Respublikası arasında Sülh Sazişinin mətninin ilkin paraflanması ilə bağlı fikir mübadiləsi aparıblar.

Tərəflər sülh prosesinin irəlilədilməsində Prezident Donald Trampın və Amerika Birləşmiş Ştatları Hökumətinin mühüm rolunu xüsusi qeyd ediblər.

Telefon danışığı zamanı ötən il ərzində Azərbaycan və Ermənistan arasında münasibətlərin normallaşdırılması istiqamətində əldə olunmuş irəliləyiş də vurğulanıb.

Söhbət zamanı iki ölkə arasında iqtisadi və ticari əlaqələrin inkişafının sülhün praktiki faydalarının konkret göstəricisi olduğu bildirilib. Bu çərçivədə Azərbaycanın neft məhsullarının Ermənistana ixracı, eləcə də tranzit yüklərin Azərbaycan ərazisindən Ermənistana və Ermənistandan digər istiqamətlərə daşınması məsələləri qeyd olunub.

Bundan əlavə, tərəflər Vaşinqtonda əldə edilmiş razılaşmalara uyğun olaraq TRIPP marşrutunun icrası ilə bağlı fikir mübadiləsi aparıblar.

Tərəflər sülh prosesinin daha da irəlilədilməsi, regionda davamlı sülh və sabitliyin təmin olunması, həmçinin regional bağlantıların və iqtisadi əməkdaşlığın inkişaf etdirilməsi istiqamətində səylərin davam etdirilməsinin vacibliyini vurğulayıblar.