Azərbaycanda internet informasiya ehtiyatlarında yerləşdirilən bəzi qanunazidd məlumatlara görə saytların fəaliyyətinə müvəqqəti məhdudiyyət tətbiq ediləcək.

Prezident İlham Əliyev bununla bağlı Cinayət Məcəlləsinə, Cinayət-Prosessual Məcəlləsinə və "İnformasiya, informasiyalaşdırma və informasiyanın mühafizəsi haqqında" Qanuna dəyişiklikləri təsdiqləyib.

Yeni dəyişikliklərə əsasən, narkotik vasitələrin, psixotrop maddələrin və onların prekursorlarının hazırlanması və istifadəsi üsulları, qanunsuz əldə edilmə yerləri, eləcə də tərkibində narkotik maddələr olan bitkilərin becərilməsi ilə bağlı məlumatların internetdə yayılması hallarında həmin internet resurslarına giriş məhdudlaşdırılacaq.

Bununla yanaşı, təhqir və böhtan xarakterli məlumatlar, şəxsi həyatın toxunulmazlığını pozan informasiyalar, habelə insanların həyat və sağlamlığına təhlükə yaradan, əhəmiyyətli əmlak ziyanına səbəb ola biləcək, ictimai təhlükəsizliyi poza biləcək, həyat təminatı, maliyyə, nəqliyyat, rabitə, sənaye, energetika və sosial infrastruktur obyektlərinin fəaliyyətini pozmağa yönəlmiş və ya belə nəticələr doğura biləcək yalan məlumatların yayılması da məhdudlaşdırılacaq.

Qanuna əsasən, belə hallarda internet informasiya ehtiyatına və ya onun müvafiq hissəsinə giriş müvafiq icra hakimiyyəti orqanının qərarı əsasında müvəqqəti olaraq məhdudlaşdırılacaq.

Qanunda edilən dəyişikliklərin əsas məqsədi ictimai təhlükəsizliyin təmin edilməsi, vətəndaşların hüquqlarının qorunması və internet məkanında qanunvericiliyin tələblərinə əməl olunmasının gücləndirilməsidir.