Abatv.az, Bizimesr.com-a istinadən xəbər verir ki, Azərbaycan Texnologiya Universitetində (ATU) əsassız pul tələbləri ilə bağlı iddialar yenidən gündəmə gəlib.

Son dövrlər universitetlə bağlı yayılan məlumatlar təhsil müəssisəsində idarəetmə, maliyyə intizamı və şəffaflıq məsələləri ilə bağlı ciddi suallar yaradıb. Sosial şəbəkələrdə və müxtəlif platformalarda yayılan tənqidi məlumatların ardınca redaksiyaya daxil olan yeni materiallar da diqqət çəkir.

Məlumata görə, universitet daxilində müəllimlərdən və müxtəlif struktur bölmələrindən müəyyən məbləğdə vəsait tələb olunması ilə bağlı iddialar səsləndirilir. Redaksiyaya təqdim olunan "WhatsApp" səs yazısında bu istiqamətdə fikirlərin yer aldığı bildirilir. Həmin səs yazısının ATU-nun Xarici dillər kafedrasının müdiri əvəzi Aysel Məmmədliyə məxsus olduğu qeyd olunur.

İddialarda vurğulanır ki, universitetdə bəzi rəhbər vəzifələrə təyinat məsələləri ilə bağlı da müəyyən tələblərin irəli sürüldüyü, ayrı-ayrı şəxslərdən təhsil müəssisəsinin daxilində görülən işlərə maliyyə dəstəyi göstərmələrinin tələb olunduğu bildirilir.

Əgər bu iddialar təsdiqini taparsa, bu, ali təhsil müəssisəsində idarəetmə prinsipləri və dövlət universitetlərində şəffaflıq məsələləri ilə bağlı ciddi narahatlıq yarada bilər. Çünki universitetlər yalnız təhsil və elmi fəaliyyət mərkəzi deyil, eyni zamanda dövlətin və cəmiyyətin etimad göstərdiyi mühüm institutlardır.

Məlumatlarda ATU-nun rektoru Yaşar Ömərovun fəaliyyəti ilə bağlı da müxtəlif iddiaların səsləndirildiyi qeyd edilir. Universitet rəhbərliyinin bu məsələlərlə bağlı mövqeyi və yayılan məlumatlara münasibəti ictimaiyyət üçün maraq doğurur.

Təhsil sahəsində çalışan şəxslər bildirirlər ki, hər hansı dövlət ali təhsil müəssisəsində şəffaflıq prinsipləri qorunmalı, müəllim və əməkdaşların üzərinə qanunsuz maliyyə yükünün qoyulmasına yol verilməməlidir.

Hazırda məsələ ilə bağlı aidiyyəti dövlət qurumlarının mövqeyi gözlənilir. İctimaiyyət isə səsləndirilən iddialara aydınlıq gətirilməsini və məsələnin obyektiv araşdırılmasını tələb edir.

Qeyd edək ki, yayılan məlumatlar iddia xarakteri daşıyır. Qarşı tərəfin mövqeyi daxil olduğu halda dərc etməyə hazırıq.

Abatv.az