Dövlət Təhlükəsizliyi Xidmətinin (DTX) yaydığı məlumata görə, son vaxtlar Azərbaycan hüdudlarından kənarda fəaliyyət göstərən mütəşəkkil kibercinayətkar qruplaşmalar tərəfindən yerli mobil operatorlara məxsus nömrələrdən istifadə olunmaqla saxta sosial şəbəkə və ani mesajlaşma hesabları yaradılır.

Bu hesablar vasitəsilə dövlət qulluqçuları, eləcə də müxtəlif müəssisə və təşkilatların əməkdaşları hədəfə alınır. Kibercinayətkarlar xüsusi proqramlar vasitəsilə dövlət qurumlarının və təşkilatların rəsmi internet səhifələrindən əməkdaşların əlaqə nömrələrini əldə edirlər.

Daha sonra həmin nömrələrə qurumların rəhbər şəxslərinin fotoşəkillərindən istifadə edilməklə yaradılmış saxta "WhatsApp" hesablarından "təcili" xarakterli mesajlar göndərilir. Zərərçəkənlərdən xarici hesablara pul köçürmək və ya digər tapşırıqları yerinə yetirmək tələb olunur.

İnformasiya təhlükəsizliyi üzrə ekspert Rəşad Əliyev bildirib ki, bu cür hücumların əsas məqsədlərindən biri dövlət qurumlarının nüfuzuna zərər vurmaq, həmçinin məxfi məlumatları ələ keçirmək ola bilər.

Ekspert vətəndaşlara bir sıra mühüm tövsiyələr verib. O bildirib ki, sosial media və mesajlaşma hesablarında iki mərhələli doğrulama aktiv edilməlidir.

Həmçinin tanış və ya rəhbər şəxsin adından "təcili pul göndər" məzmunlu mesaj daxil olarsa, vəsait köçürməzdən əvvəl həmin şəxslə telefon vasitəsilə əlaqə saxlayaraq məlumatın doğruluğunu yoxlamaq lazımdır.

Şübhəli və naməlum linklərə daxil olmaq, eləcə də tanımadığınız şəxslərin göndərdiyi faylları açmaq tövsiyə edilmir. Belə linklər şəxsi və maliyyə məlumatlarının oğurlanmasına səbəb ola bilər.

Mütəxəssis vətəndaşları şübhəli hallarda qarşı tərəflə mütləq başqa rabitə vasitəsi ilə əlaqə saxlayaraq məlumatı ikili şəkildə yoxlamağa çağırıb.

Abatv.az