Azərbaycanda gömrük sərhədindən keçirilən malların və nəqliyyat vasitələrinin bəyan edilməsi qaydalarında dəyişiklik edilib.

Abatv.az xəbər verir ki, bununla bağlı Baş nazir Əli Əsədov qərar imzalayıb.

Dəyişikliyə əsasən, “Qırmızı kanal” buraxılış sistemi mallara dair sadələşdirilmiş bəyannamənin təqdim edilməsi ilə onların kağız üzərində yazılı və ya elektron formada bəyan olunmasını nəzərdə tutur.

Yeni qaydalara əsasən, fiziki şəxslər tərəfindən əl yükündə və ya müşayiət olunan baqajda istehsal və kommersiya məqsədləri üçün nəzərdə tutulmayan, lakin yazılı formada bəyan edilməli olan mallar keçirildikdə, gömrük orqanlarına müəyyən edilmiş formada sadələşdirilmiş bəyannamə təqdim ediləcək.

Eyni zamanda, müşayiət olunmayan baqajda daşınan, istehsal və ya kommersiya məqsədləri üçün nəzərdə tutulmayan mallarla bağlı da gömrük orqanlarına sadələşdirilmiş bəyannamə təqdim olunması tələb ediləcək.

Bu tələb Ümumdünya Poçt İttifaqının aktlarında nəzərdə tutulan sənədlərlə müşayiət olunan beynəlxalq poçt göndərişlərinə şamil edilməyəcək.

Qeyd edək ki, dəyişikliklərlə bağlı sadələşdirilmiş bəyannamələrin formaları da müəyyənləşdirilib. Əl yükü və müşayiət olunan baqajda keçirilən mallar üçün Qaydaların 10 nömrəli əlavəsində, müşayiət olunmayan baqajda keçirilən mallar üçün isə 12 nömrəli əlavəsində göstərilən forma tətbiq ediləcək.

Qərar dərc edildiyi gündən 30 gün sonra qüvvəyə minəcək.