"Space" TV-nin bank hesablarına həbs qoyulması ilə bağlı yayılan məlumatlar ictimai müzakirələrə səbəb olub. Məsələ ilə bağlı telekanalın keçmiş baş direktoru Vado Korovin açıqlama verərək səsləndirilən ittihamlara münasibət bildirib.

Korovin qeyd edib ki, söhbət 2021-ci ildə "Xalq Bank" ASC-dən cəlb edilmiş 235 min ABŞ dolları məbləğində kredit xətti üzrə öhdəliklərdən gedir. Onun sözlərinə görə, həmin kredit onun telekanala rəhbər təyin olunmasından iki il əvvəl rəsmiləşdirilib və bu səbəbdən məsuliyyətin yalnız onun üzərinə qoyulması doğru deyil.

Keçmiş baş direktor bildirib ki, rəhbərliyi dövründə telekanalı ciddi maliyyə öhdəlikləri, borclar və texniki problemlərlə təhvil alıb. Buna baxmayaraq, komandası ilə birlikdə kanalın fəaliyyətini davam etdirdiklərini, əməkhaqqılarının vaxtında ödənildiyini və iri kommersiya müqavilələrinin bağlandığını vurğulayıb.

Vado Korovin, həmçinin rəhbərliyi dövründə "Space" TV-nin reytinq baxımından milli telekanallar arasında yeddinci pillədən ikinci pilləyə yüksəldiyini iddia edib. O, bu nəticənin komandanın peşəkar fəaliyyətinin göstəricisi olduğunu deyib.

Keçmiş direktor telekanalda genişmiqyaslı texniki yenilənmələrin aparıldığını da diqqətə çatdırıb. Onun sözlərinə görə, bu müddətdə robotlaşdırılmış televiziya kameraları, yeni studiya kameraları, televiziya pultları, kompüterlər, mikrofonlar, istehsalat avadanlıqları və xidməti avtomobillər alınıb, studiyalar müasirləşdirilib.

Korovin bildirib ki, həyata keçirilən bütün satınalmalar və görülən işlər müvafiq sənədlərlə rəsmiləşdirilib, müqavilələr, hesab-fakturalar və təhvil-təslim aktları telekanalın arxivində saxlanılır. O əlavə edib ki, bu məlumatlar Audiovizual Şuranın sənədlərində də öz əksini tapıb.

Sonda Vado Korovin hazırkı rəhbərliyin açıqlamalarını məsuliyyəti başqalarının üzərinə yönəltmək cəhdi kimi qiymətləndirib və bildirib ki, irəli sürdüyü bütün fikirlər maliyyə sənədləri, müqavilələr və rəsmi hesabatlarla təsdiqlənə bilər.