İyulun 24-də Bakı Apellyasiya Məhkəməsində Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, soyqırımı, terrorçuluq, terrorçuluğu maliyyələşdirmə, hakimiyyəti zorla ələ keçirmə və digər ağır cinayətlərdə təqsirli bilinərək Bakı Hərbi Məhkəməsinin hökmü ilə məhkum edilmiş Ermənistan Respublikası vətəndaşlarının apellyasiya şikayətləri üzrə məhkəmə baxışı davam etdirilib.

Abatv.az xəbər verir ki, məhkəmə prosesi Bakı Apellyasiya Məhkəməsinin hakimi Elmar Rəhimovun sədrliyi, hakimlər Emin Mehdiyev və Mehriban Qarayevanın iştirakı ilə keçirilib. İclas zamanı təqsirləndirilən şəxslər erməni və rus dillərində tərcüməçilərlə, həmçinin müdafiə hüquqlarının təmin olunması məqsədilə vəkillərlə təmin ediliblər.

Məhkəmə iclasında zərərçəkmiş şəxslərin nümayəndələri və dövlət ittihamını müdafiə edən prokurorlar iştirak ediblər. Baş Prokurorluğun Dövlət ittihamının müdafiəsi üzrə idarəsinin şöbə rəisi Abbas Abbaslı, eləcə də şöbə prokurorları Anar Ələkbərov və Sevinc Qasımova çıxış edərək ittiham tərəfinin mövqeyini məhkəməyə təqdim ediblər.

Prokuror Abbas Abbaslı 2020-ci il Vətən müharibəsi zamanı Ermənistan silahlı qüvvələrinin törətdiyi cinayət faktlarına diqqət çəkərək Arayik Arutyunyanın cinayətkar fəaliyyəti ilə bağlı toplanmış sübutları sadalayıb və onun apellyasiya şikayətinin əsassız olduğunu bildirib.

Prokuror Anar Ələkbərov işğal dövründə Azərbaycanın suveren ərazilərində törədilmiş çoxsaylı cinayətlərlə bağlı sübutları təqdim edib, Bako Saakyanın cinayətkar fəaliyyətinə dair materialların onun apellyasiya şikayətini əsassız etdiyini vurğulayıb.

Dövlət ittihamçısı Sevinc Qasımova isə Arkadi Qukasyanın ittiham olunduğu cinayət əməlləri üzrə sübutlara istinad edərək onun da apellyasiya şikayətinin təmin olunmamalı olduğunu bildirib.

İttiham tərəfi qeyd edib ki, birinci instansiya məhkəməsində cinayət işi üzrə bütün sübutlar tam, hərtərəfli və obyektiv şəkildə araşdırılıb, zərərçəkmişlərin və şahidlərin ifadələri, ekspertiza rəyləri, maddi sübutlar və digər sənədlərlə təqsirləndirilən şəxslərin əməlləri təsdiqini tapıb.

Məhkəmənin növbəti iclası iyulun 27-nə təyin edilib.

Xatırladaq ki, Bakı Hərbi Məhkəməsinin 5 fevral 2026-cı il tarixli hökmü ilə Arayik Arutyunyan, Levon Mnatsakanyan, David Manukyan, Davit İşxanyan və David Babayan ömürlük azadlıqdan məhrum ediliblər. Arkadi Qukasyan və Bako Saakyan 20 il, Madat Babayan və Melikset Paşayan 19 il, Qarik Martirosyan 18 il, Davit Allahverdiyan və Levon Balayan 16 il, Vasili Beqlaryan, Qurgen Stepanyan və Erik Qazaryan isə 15 il müddətinə azadlıqdan məhrumetmə cəzasına məhkum olunublar.