Şəmkir rayonunda baş verən qida zəhərlənməsi faktı ilə bağlı Azərbaycan Respublikası Qida Təhlükəsizliyi Agentliyi (AQTA) tərəfindən araşdırmalara başlanılıb.

Abatv.az xəbər verir ki, bu barədə Oxu.Az-ın sorğusuna cavab olaraq AQTA məlumat yayıb.

Bildirilib ki, Agentliyə daxil olan məlumat əsasında zəhərlənən şəxslərə müvafiq tibbi yardım göstərilib. Onların vəziyyətinin qənaətbəxş olduğu müəyyən edilib və ambulator müalicə üçün evə buraxılıbları bildirilib.

Araşdırmalar zamanı hadisənin Şəmkir rayonunun Kür qəsəbəsində fəaliyyət göstərən "Narın Qala" restoranında baş verdiyi müəyyənləşib.

AQTA əməkdaşları tərəfindən sözügedən iaşə obyektində yoxlamalar aparılıb, müəssisənin fəaliyyəti müvəqqəti olaraq dayandırılıb. Eyni zamanda, hadisənin səbəblərinin müəyyənləşdirilməsi məqsədilə müxtəlif qida nümunələri götürülərək laborator müayinələrə göndərilib.

Qurumdan bildirilib ki, faktla bağlı araşdırmalar davam etdirilir və laborator nəticələrdən sonra ictimaiyyətə əlavə məlumat veriləcək.