27 iyul – 2 avqust tarixlərində Bakıda təşkil olunacaq güləş üzrə U17 dünya çempionatının bilet satışı rəsmən başlayıb.

Abatv.az xəbər verir ki, bu barədə Azərbaycan Güləş Federasiyası məlumat yayıb.

Bildirilib ki, yarış Milli Gimnastika Arenasında keçiriləcək. Azarkeşlər biletləri onlayn qaydada "iTicket" platforması, eləcə də satış məntəqələri vasitəsilə əldə edə bilərlər. Biletlərin qiyməti 2 və 5 manat təşkil edir.

Çempionatın proqramına əsasən, yarışlar hər gün iki sessiyada keçiriləcək. Gündüz sessiyasında (10:30–14:30) ilkin qarşılaşmalar baş tutacaq və güləşçilər yarımfinala vəsiqə uğrunda mübarizə aparacaqlar. Axşam sessiyasında (17:00–20:00) isə yarımfinal görüşləri, medal uğrunda qarşılaşmalar və qaliblərin mükafatlandırma mərasimləri keçiriləcək.

Bir bilet həm gündüz, həm də axşam sessiyalarını izləməyə imkan verəcək. Bununla yanaşı, sessiyalar arasında Milli Gimnastika Arenasında yaradılacaq fan-zonada azarkeşlər üçün müxtəlif əyləncə proqramları, interaktiv oyunlar, tanınmış güləşçilərin imza mərasimləri və digər maraqlı tədbirlər təşkil olunacaq.

Qeyd edək ki, Bakıda keçiriləcək U17 dünya çempionatı dünyanın müxtəlif ölkələrindən yüzlərlə gənc güləşçini bir araya gətirəcək və Azərbaycanın növbəti dəfə mötəbər beynəlxalq idman yarışına ev sahibliyi etməsi baxımından xüsusi əhəmiyyət daşıyır.