Azərbaycan milli komandasının hücumçusu Mahir Emreli karyerasını yenidən Polşada davam etdirəcək.

ABATV.az xəbər verir ki, 29 yaşlı futbolçu Polşanın "Rakuv" klubuna transfer olunub. Bu barədə Çenstoxova təmsilçisi rəsmi sosial şəbəkə hesabları vasitəsilə məlumat yayıb.

Klubun paylaşımında bildirilib: "61 dəfə Azərbaycan milli komandasının formasını geyinmiş Mahir Emreli "Rakuv"un yeni üzvüdür".

Mahir Emreli Almaniyanın "Kayzerslautern" klubundan "Rakuv"a icarə əsasında keçib. Razılaşmaya əsasən, mövsümün sonunda Polşa təmsilçisi futbolçunun transfer hüququnu birdəfəlik əldə etmək imkanına malik olacaq.

Transferdən əvvəl hücumçu klubda tibbi müayinədən keçib. "Rakuv" ötən mövsüm Polşa Ekstraklasasında dördüncü yeri tutaraq UEFA Konfrans Liqasına vəsiqə qazanıb. Komanda turnirin II təsnifat mərhələsində Maltanın "Valletta" klubu ilə qarşılaşacaq.

Qeyd edək ki, Mahir Emreli daha əvvəl də Polşada çıxış edib. O, 2021/2022 mövsümünün ilk yarısında "Legiya" klubunun formasını geyinib. Son olaraq isə Almaniyanın "Kayzerslautern" komandasında çıxış edirdi.