Azərbaycandan Ermənistana neft məhsullarının növbəti partiyasının ixracı həyata keçiriləcək.

Abatv.az xəbər verir ki, sentyabrın 5-də 16 vaqondan ibarət 977 ton dizel yanacağının Biləcəri stansiyasından Böyük Kəsik istiqamətinə yola salınması nəzərdə tutulur.

Məlumata görə, indiyədək Azərbaycandan Ermənistana təxminən 16 min ton dizel yanacağı, 5 min tona yaxın Aİ-92 və Aİ-95 markalı avtomobil benzini ixrac edilib.

Bununla yanaşı, Rusiya ilə Ermənistan arasında yük daşımaları çərçivəsində Azərbaycandan tranzit keçməklə Ermənistana növbəti yüklərin göndərilməsi də həyata keçiriləcək.

Belə ki, Rusiyadan Azərbaycandan tranzit yolu ilə Ermənistana 5 vaqonda 355 ton buğda, 3 vaqonda 180 ton gübrə və 2 vaqonda 138 ton taxta göndəriləcək.

Ümumilikdə 10 vaqondan ibarət yüklərin Böyük Kəsik istiqamətinə yola salınması planlaşdırılır.

Bu daşımalar Azərbaycan ərazisindən tranzit yükdaşımalarının davam etdirildiyini və regional nəqliyyat-kommunikasiya əlaqələrinin praktiki baxımdan genişləndiyini göstərir.