Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Gəncədə təlim keçmiş ispan pilotların tarixindən bəhs edən sənədli filmi sosial şəbəkə hesabında paylaşıb.

Hikmət Hacıyev bildirib ki, Gəncə uzun illər onun üçün sirr olaraq qalıb. Onun sözlərinə görə, şəhərin bəzi yaşlı sakinlərinin məktəblərdən birini "İspan məktəbi" adlandırması və Gəncədə ispan pilotların məzarlarının olması hər zaman maraq doğurub.

O qeyd edib ki, AnewZ tərəfindən hazırlanan "The Aviators of Ganja" ("Gəncənin aviatorları") adlı araşdırma sənədli filmi bu unudulmuş tarixin bir hissəsini üzə çıxarır.

Filmdə bildirilir ki, 1936–1939-cu illərdə İspaniyada baş verən vətəndaş müharibəsi zamanı bir qrup gənc ispan pilot uçuş hazırlığı keçmək üçün Gəncəyə göndərilib. Fransisko Frankonun hakimiyyətə gəlməsindən sonra onların əksəriyyəti vətənlərinə qayıda bilməyib, Sovet İttifaqında qalaraq sovet hərbi hava qüvvələrində xidmət ediblər.

Sənədli filmdə vurğulanır ki, İkinci Dünya müharibəsi illərində həmin pilotların bir qismi Azərbaycanın hava məkanının, eləcə də strateji əhəmiyyət daşıyan Bakı neft yataqlarının nasist Almaniyasının hava hücumlarından qorunmasında iştirak edib. Onların bir çoxu isə ömürlərinin sonuna qədər doğma vətənlərini görə bilməyiblər.

Hikmət Hacıyev paylaşımında qeyd edib ki, həmin insanların yaddaşında ən çox qalan məqam azərbaycanlıların onlara göstərdiyi humanist münasibət olub. O vurğulayıb ki, Azərbaycan xalqı ən çətin dövrlərdə belə malik olduğu məhdud imkanları onlarla bölüşüb.

"Bu, tarixin az tanınan, lakin dərin təsir bağışlayan hekayələrindən biridir", – deyə Hikmət Hacıyev paylaşımında bildirib.