Prezident İlham Əliyev "Ümumi təhsil haqqında" Azərbaycan Respublikasının Qanununda dəyişiklik edilməsi ilə bağlı qanunu imzalayıb.

Yeni dəyişikliklərə əsasən, dövlət ümumi təhsil müəssisələrində fəaliyyət göstərən təhsilverənlər üçün geyimlə bağlı tələblər müvafiq icra hakimiyyəti orqanının müəyyən etdiyi qurum tərəfindən müəyyən ediləcək.

Qanunda həmçinin qeyd olunur ki, dövlət ümumi təhsil müəssisələrində həm təhsilalanlar, həm də təhsilverənlər müəyyən edilmiş geyim tələblərinə riayət etməyə borcludurlar.

Bununla yanaşı, dövlət başçısı "Ümumi təhsil haqqında" Azərbaycan Respublikasının Qanununda dəyişiklik edilməsi barədə" 2026-cı il 7 iyul tarixli 434-VIIQD nömrəli Qanunun tətbiqinin təmin olunması məqsədilə müvafiq Fərman da imzalayıb.

Fərmana əsasən, dövlət ümumi təhsil müəssisələrində təhsilverənlərin geyim qaydalarını müəyyən edəcək səlahiyyətli qurum kimi Nazirlər Kabineti müəyyən edilib.

Qeyd edək ki, yeni dəyişikliklərin məqsədi ümumi təhsil müəssisələrində vahid yanaşmanın formalaşdırılması, təhsil mühitində nizam-intizamın və peşəkarlıq prinsiplərinin daha da gücləndirilməsidir.