İyulun 31-də Qırğızıstanda Azərbaycan və Qırğızıstan prezidentlərinin təltifolunma mərasimi keçirilib.

Qanuntv.az xəbər verir ki, mərasimdə Qırğızıstan Prezidenti Azərbaycan Prezidenti ə Qırğızıstanın ali dövlət mükafatlarından olan I dərəcəli "Manas" ordenini təqdim edib.

Sadır Japarov çıxışında bildirib ki, Prezident İlham Əliyevin rəhbərliyi ilə Azərbaycan mühüm inkişaf yolu keçərək regionun və dünyanın nüfuzlu dövlətlərindən birinə çevrilib. O vurğulayıb ki, iki ölkə arasında münasibətlər strateji tərəfdaşlıqdan müttəfiqlik səviyyəsinə yüksəlib və bu prosesdə Azərbaycan Prezidentinin şəxsi rolu böyükdür.

Daha sonra Prezident İlham Əliyev yüksək mükafata görə təşəkkürünü bildirərək, bunu Azərbaycan–Qırğızıstan qardaşlığının və qarşılıqlı etimadın göstəricisi kimi qiymətləndirib. Dövlət başçısı iki ölkə arasında münasibətlərin bundan sonra da uğurla inkişaf edəcəyinə əminliyini ifadə edib.

Mərasimdə həmçinin Qırğızıstan Prezidenti Sadır Japarovun Azərbaycan ilə Qırğızıstan arasında dostluq, qardaşlıq və strateji tərəfdaşlıq əlaqələrinin inkişafına verdiyi töhfəyə görə Azərbaycanın ali dövlət təltifi – "Heydər Əliyev" ordeni ilə təltif olunması haqqında sərəncam elan edilib.

Prezident İlham Əliyev ordeni şəxsən Sadır Japarova təqdim edib.

Qırğızıstan Prezidenti göstərilən yüksək etimada görə təşəkkür edərək bildirib ki, bu mükafatı iki qardaş xalq arasında möhkəm dostluğun, strateji tərəfdaşlığın və müttəfiqliyin rəmzi kimi qəbul edir.