Şəmkir rayonunda İqtisadiyyat Nazirliyi yanında Əmlak Məsələləri Dövlət Xidmətinin Daşınmaz Əmlakın Dövlət Kadastrı və Reyestri publik hüquqi şəxsin 11 saylı Ərazi İdarəsinin fəaliyyəti ilə bağlı vətəndaşların narazılığı gündən-günə artır. Sakinlərin səsləndirdiyi şikayətlər göstərir ki, qurumun fəaliyyətində operativlik, şəffaflıq və vətəndaş məmnuniyyəti prinsipləri ciddi şəkildə pozulur.

Abatv.az saytının rəhbəri Amil müəllimin vətəndaşlarla keçirdiyi görüşlər zamanı səsləndirilən fikirlər bir daha təsdiq edir ki, problem fərdi xarakter daşımır. İnsanların sözlərinə görə, əmlakın qeydiyyatı, sənədləşmə və digər hüquqi prosedurlar əsassız gecikdirilir, müraciətlərə vaxtında baxılmır, nəticədə vətəndaşlar günlərlə, bəzən isə aylarla müxtəlif maneələrlə üzləşirlər.

Ən ciddi narahatlıq doğuran məqam isə odur ki, bu qədər narazılığa baxmayaraq, 11 saylı Ərazi İdarəsinin rəhbəri Əlağa Paşayev tərəfindən ictimaiyyətə hər hansı əsaslandırılmış açıqlama verilmir. Dövlət-vətəndaş münasibətlərində əsas meyar hesabatlılıq və məsuliyyət olduğu halda, yaranmış vəziyyətə susqun yanaşılması haqlı suallar doğurur.

Prezident İlham Əliyev dəfələrlə dövlət məmurlarının vətəndaşlara xidmət etməli olduqlarını, süni maneələr yaradan və məsuliyyətsiz davranan şəxslərə qarşı güzəşt edilməyəcəyini bildirib. Bu baxımdan Şəmkirdə yaranmış vəziyyət aidiyyəti qurumlar tərəfindən ciddi araşdırılmalı, vətəndaşların şikayətləri obyektiv qiymətləndirilməli, nöqsanlara yol verən şəxslər barəsində qanunamüvafiq tədbirlər görülməlidir.

Dövlət qurumunun nüfuzu vətəndaşın ona olan etimadı ilə ölçülür. Əgər bir idarənin fəaliyyəti cəmiyyətdə narazılıq və inamsızlıq yaradırsa, həmin qurumun rəhbərliyi ilk növbədə məsuliyyəti öz üzərinə götürməli, problemlərin aradan qaldırılması istiqamətində real addımlar atmalıdır. Əks halda, səslənən narazılıqların miqyası daha da genişlənəcək.

Abatv.az qarşı tərəfin də mövqeyini dərc etməyə hazırdır.