Azərbaycanda ali təhsil pilləsi üzrə məzunlara elektron diplomların təqdim edilməsinə start verilib.

Elm və Ali Təhsil üzrə Dövlət Agentliyinin yaydığı məlumata görə, "Təhsil haqqında" Azərbaycan Respublikasının Qanununun 27-ci maddəsinə, eləcə də Nazirlər Kabinetinin təsdiq etdiyi müvafiq qaydalara əsasən, ali təhsil müəssisələrinin bakalavriat, əsas (baza ali) tibb təhsili, magistratura və rezidentura səviyyələrini (doktorantura istisna olmaqla) başa vuran şəxslərə təhsil haqqında dövlət sənədi artıq elektron formatda təqdim olunur.

Bildirilib ki, müvafiq dövlət sənədləri "Təhsil Mərkəzləşdirilmiş İnformasiya Sistemi"ndə (TMİS) elektron sənəd şəklində yaradılır və məzunların istifadəsinə verilir.

Qaydaların tələblərinə uyğun olaraq elektron diplomların təqdimatına ilk olaraq Bakı Dövlət Universitetində başlanılıb. Universitetin məzunları yaxın günlərdə diplomlarını "mygov" rəqəmsal hökumət platforması və Elm və Təhsil Nazirliyinin rəsmi edu.gov.az internet səhifəsi vasitəsilə əldə edə biləcəklər.

Agentlikdən bildirilib ki, hazırda ölkənin digər ali təhsil müəssisələrində də elektron diplomların hazırlanması və təqdim olunması prosesi mərhələli şəkildə davam etdirilir.

Qeyd edək ki, elektron diplom sisteminin tətbiqi məzunların təhsil sənədlərinə daha operativ çıxışını təmin etməklə yanaşı, sənədlərin doğrulanmasını asanlaşdıracaq və dövlət xidmətlərinin rəqəmsallaşdırılması istiqamətində atılan mühüm addımlardan biri hesab olunur.