Azərbaycan Respublikasının Prezidenti İlham Əliyev "Psixiatriya yardımı haqqında" Azərbaycan Respublikasının Qanununda dəyişiklik edilməsi barədə qanunu imzalayıb.

Abatv.az xəbər verir ki, dəyişikliklər psixiatriya yardımı göstərilməsi, məcburi müayinə, qeyri-könüllü hospitallaşdırma və pasiyentlərin hüquqlarının qorunması sahəsində yeni tənzimləmələri nəzərdə tutur.

Qanuna əsasən, psixiatriya müayinəsinin yekunu (diaqnoz) barədə məlumat dərhal müayinə üçün müraciət etmiş şəxsə, prokurora və ya müvafiq icra hakimiyyəti orqanının müəyyən etdiyi quruma təqdim ediləcək.

Yeni dəyişikliklərə görə, inzibati xəta törətməkdə şübhəli bilinən şəxsin psixiatriya yardımının gecikdirilməsi onun və ya digər şəxslərin həyat və sağlamlığı üçün təhlükə yaradarsa, həmin şəxsin və ya qanuni nümayəndəsinin razılığı olmadan psixiatriya müayinəsinin aparılması barədə qərarı prokuror və ya səlahiyyətli vəzifəli şəxs qəbul edə biləcək.

Bundan başqa, məcburi hospitallaşdırılan şəxslərin digər pasiyentlərdən təcrid olunmuş şəraitdə müalicə alması, psixiatriya müəssisələrində təhlükəsizlik tədbirlərinin gücləndirilməsi, həmçinin qeyri-könüllü stasionar müalicə ilə bağlı qərarlar barədə yaxın qohumların, qanuni nümayəndələrin və prokurorun dərhal məlumatlandırılması da qanunda öz əksini tapıb.

Dəyişikliklərə əsasən, psixiatriya yardımı alan və ya əvvəllər belə yardım almış şəxslər göstərilən tibbi xidmətlər barədə məlumatları elektron sağlamlıq kartı sistemi vasitəsilə əldə edə biləcəklər. Qanuni nümayəndələrə isə bu məlumatlar yazılı müraciətdən sonra iki iş günü ərzində təqdim olunacaq.

Qeyd edək ki, Prezident İlham Əliyev qanunun tətbiqini təmin etmək məqsədilə, 2026-cı il 13 iyul tarixli 444-VIIQD nömrəli Qanunun qüvvəyə minməsi ilə əlaqədar müvafiq Fərman da imzalayıb.