Bakı Qızlar Universitetinin təhsil fəaliyyəti dayandırılıb.

Abatv.az xəbər verir ki, bu barədə Elm və Təhsil Nazirliyi məlumat yayıb.

Bildirilib ki, "Təhsil haqqında" Azərbaycan Respublikası Qanununa uyğun olaraq, 10 iyul 2026-cı il tarixində keçirilən Akkreditasiya Şurasının iclasında universitet üzrə institusional və proqram akkreditasiyasının yekun qiymətləndirmə hesabatları müzakirə edilib.

Müzakirələrin və səsvermənin nəticəsinə əsasən, ali təhsil müəssisəsinin institusional və proqram akkreditasiyası üzrə yekun nəticə "uyğun deyil" kimi qiymətləndirilib və universitetin akkreditasiya olunmuş hesab edilməməsi barədə qərar qəbul edilib.

Nazirliyin məlumatına görə, qiymətləndirmə zamanı dövlət təhsil standartlarının, normativ hüquqi aktların və keyfiyyət təminatı tələblərinin yerinə yetirilməsində ciddi uyğunsuzluqlar aşkar edilib. Bu səbəbdən ali təhsil müəssisəsinin təhsil fəaliyyətinin dayandırılması ilə bağlı qanunvericilikdə nəzərdə tutulan prosedurlara başlanılıb.

Bununla yanaşı, "Lisenziyalar və icazələr haqqında" Azərbaycan Respublikası Qanununa uyğun olaraq, universitetə verilmiş lisenziyanın dayandırılması və ya ləğvi ilə bağlı səlahiyyətli orqana təqdimat göndərilib.

Məlumata əsasən, Azərbaycan Respublikasının İqtisadiyyat Nazirliyi 30 iyul 2026-cı il tarixli 92 nömrəli sərəncamla Bakı Qızlar Universitetinə 11 sentyabr 2018-ci ildə verilmiş EL-358/2018 nömrəli lisenziyanı ləğv edib.

Elm və Təhsil Nazirliyi bildirib ki, universitetdə təhsil alan tələbələrin təhsil hüquqlarının qorunması və təhsildə fasiləsizliyin təmin edilməsi məqsədilə onların ixtisaslarına uyğun olaraq digər ali təhsil müəssisələrinə köçürülməsi həyata keçiriləcək.

Nazirlik vurğulayıb ki, akkreditasiya prosesinin əsas məqsədi ali təhsildə keyfiyyətin yüksəldilməsi, tələbələrin hüquqlarının müdafiəsi və təhsil müəssisələrinin fəaliyyətinin qanunvericiliyin tələblərinə uyğun təşkil olunmasının təmin edilməsidir.