Qəbul qaydalarında edilən son dəyişikliklər bir qrup subbakalavrın narazılığına səbəb olub. Onlar yeni qaydaların ali təhsil müəssisələrinə qəbul şanslarını əhəmiyyətli dərəcədə azaltdığını bildirirlər.

Abatv.az xəbər verir ki, subbakalavrların sözlərinə görə, 150 balla qəbul aparılan ixtisasların sayının artırılması nəticəsində onların müsabiqədə iştirak edə biləcəyi vakant plan yerlərinin sayı azalıb.

Müraciətdə qeyd olunur ki, xüsusilə I və II ixtisas qrupları üzrə bəzi ixtisasların 150 ballıq ixtisaslar siyahısına daxil edilməsi II ixtisas qrupu üzrə kollec məzunlarının imtahansız ali məktəbə qəbul imkanlarını məhdudlaşdırıb.

Subbakalavrlar bildirirlər ki, üç il ərzində ixtisasları üzrə nəzəri və praktik biliklər əldə edib, yüksək göstəricilər toplasalar da, sonda ali təhsil almaq imkanlarının məhdudlaşdırılması onları narahat edir. Onların fikrincə, bu vəziyyət gənclərin təhsilə marağını azalda və kolleclərin məqsədini sual altına qoya bilər.

Müraciətdə vurğulanır ki, subbakalavrlar heç kimə üstünlük verilməsini istəmirlər, yalnız ədalətli yanaşma tələb edirlər. Onlar subbakalavrlar üçün ayrıca plan yerlərinin ayrılmasını və abituriyentlərlə subbakalavrların ayrı-ayrı müsabiqələrdə iştirak etməsini təklif edirlər.

Məsələ ilə bağlı Dövlət İmtahan Mərkəzi bildirib ki, subbakalavrların ali təhsil müəssisələrinə qəbulu Nazirlər Kabinetinin müəyyən etdiyi qaydalara uyğun həyata keçirilir.

Qurumun açıqlamasına görə, subbakalavrlar əvvəlki qaydada qəbul imtahanında iştirak etmədən də müsabiqə yolu ilə ali məktəblərə qəbul olmaq hüququnu saxlayırlar. Bununla yanaşı, qəbul imtahanı verən subbakalavrlar həm topladıqları balla ümumi müsabiqədə, həm də bitirdikləri ixtisasa uyğun olaraq subbakalavr müsabiqəsində iştirak edə bilərlər.