ABŞ-nin İrana qarşı hərbi əməliyyatları genişləndirməsi və ya quru müdaxiləsinə başlaması halında, Tehran Qırmızı dəniz və Bab əl-Məndəb boğazında gəmiçiliyi məhdudlaşdırmağa cəhd göstərə bilər.

Bu barədə The Wall Street Journal məlumatlı mənbələrə istinadən xəbər yayıb.

Nəşrin məlumatına görə, son günlərdə İslam İnqilabı Keşikçiləri Korpusu (SEPAH) Vaşinqtona xəbərdarlıq edərək bildirib ki, ABŞ hücumları intensivləşdirərsə və ya quru əməliyyatı variantını nəzərdən keçirərsə, İran Bab əl-Məndəb boğazını və Qırmızı dənizi bağlamağa cəhd göstərə, həmçinin bölgədə hərəkət edən gəmilərə hücum edə bilər.

Məlumatda qeyd olunur ki, bu ssenari regionda təhlükəsizlik vəziyyətini daha da gərginləşdirə və beynəlxalq dəniz ticarətinə ciddi təsir göstərə bilər.

Xatırladaq ki, iyul ayında İranın dəstəklədiyi husilər ilə Səudiyyə Ərəbistanı arasında qarşılıqlı hücumlar yenidən intensivləşib. Bu proses fonunda husilər Səudiyyə Ərəbistanına məxsus gəmilər üçün dəniz blokadası elan etdiklərini açıqlayıblar.

Məsələ ilə bağlı rəsmi Tehran və Vaşinqton tərəfindən əlavə açıqlama verilməyib.