Almaniyanın paytaxtı Berlinin mərkəzində yerləşən Tirqarten parkı yaxınlığında avtomobili insanların üzərinə sürməkdə şübhəli bilinən şəxs xüsusi polis əməliyyatı zamanı zərərsizləşdirilib.

Berlin polisinin "X" sosial şəbəkəsində yaydığı məlumata görə, şübhəli saat 18:00 radələrində Şpandau rayonundakı bağ massivində aşkarlanıb.

İlkin məlumata əsasən, o, əlində soyuq silahla polis əməkdaşlarının üzərinə hücum etməyə cəhd göstərib. Bundan sonra Berlinin xüsusi təyinatlı polis qüvvələri odlu silahdan istifadə edib. Şübhəli aldığı güllə yaralarından hadisə yerində ölüb.

Polis hadisə ilə bağlı araşdırmaların davam etdiyini bildirib.

Bundan əvvəl Almaniyanın "Bild" qəzeti yazmışdı ki, avtomobili insanların üzərinə sürməkdə şübhəli bilinən şəxs Əbdül Bəllut adlı gəncdir. Məlumata görə, o, 2025-ci ildə Suriyaya getməyə cəhd edib, lakin Livanda saxlanılaraq Almaniya vətəndaşı kimi yenidən Berlinə deportasiya olunub.

İddialara əsasən, 2026-cı ilin may ayında Tirqarten Rayon Məhkəməsi onu dövlət təhlükəsizliyinə qarşı yönəlmiş ağır zorakı cinayət hazırlamaqda təqsirli bilərək 1 il 10 ay müddətinə azadlıqdan məhrum edib. Prokurorluq isə cəzanın az olduğunu hesab edərək 2 il 10 ay həbs tələbi ilə apellyasiya şikayəti verib. Apellyasiya prosesi davam etdiyi müddətdə o, polis tərəfindən gizli nəzarətdə saxlanılıb və telefon danışıqları izlənilib.

"Die Welt" qəzetinin məlumatına görə isə həbsdən azad olunduqdan sonra Əbdül Bəllut deradikallaşdırma proqramına cəlb edilib və onun 26 məsləhət görüşündə iştirak etməsi planlaşdırılıb. Buna səbəb kimi sosial şəbəkələrdə terror qruplaşmasını dəstəklədiyi ehtimal olunan paylaşımlar göstərilib. Hansı terror təşkilatından söhbət getdiyi isə hələlik açıqlanmayıb.

Faktla bağlı araşdırmalar davam etdirilir.