Rusiya Dövlət Duması gələn həftə məhkumluğu ödənilməmiş və ya götürülməmiş əcnəbilərin Rusiya vətəndaşlığı və ya ölkədə daimi yaşamaq hüququ əldə etməsini istisna edən qanun layihəsini müzakirəyə çıxaracaq.

Abatv.az xəbər verir ki, bu barədə Dövlət Dumasının sədri Vyaçeslav Volodin "Max" kanalında paylaşım edib.

Bildirilib ki, yeni qanun layihəsinə əsasən, məhdudiyyətlər Rusiya ərazisində və ya ölkə hüdudlarından kənarda törədilmiş istənilən cinayətə görə yaranmış məhkumluqlara da şamil ediləcək.

Sənəddə, həmçinin qeyd olunur ki, belə fakt sonradan aşkar edilərsə, həmin şəxslərə verilmiş yaşayış icazəsi və ya müvəqqəti yaşamaq icazəsi ləğv ediləcək.

Vyaçeslav Volodin bildirib ki, bu qaydalar Rusiya ərazisində qaçqın statusu almış, eləcə də siyasi və ya müvəqqəti sığınacaq verilmiş xarici ölkə vətəndaşlarına aid edilməyəcək.

Dövlət Dumasının sədri əlavə edib ki, 2024-cü ildən etibarən Rusiyada miqrasiya siyasətinin sərtləşdirilməsi istiqamətində artıq 30 federal qanun qəbul olunub.