2026-2027-ci tədris ili üçün ali təhsil müəssisələrinin bakalavriat səviyyəsinə II və III ixtisas qrupları üzrə dövlət sifarişi ilə ayrılmış plan yerlərinin sayı açıqlanıb.

ABATV.az xəbər verir ki, bu barədə məlumat “Abituriyent” jurnalının 4-cü sayında dərc olunub.

Bildirilib ki, II ixtisas qrupu üzrə ümumilikdə 4 185 dövlət sifarişli plan yeri ayrılıb.

Ən çox dövlət sifarişli yer İqtisadiyyat ixtisası üzrə 680, Turizm işinin təşkili üzrə 550, Maliyyə üzrə 550, Mühasibat üzrə isə 500 yer təşkil edir.

Marketinq, biznesin idarə edilməsi, turizm bələdçiliyi, turizm işinin təşkili, mühasibat, dövlət və bələdiyyə idarəetməsi, maliyyə, iqtisadiyyat, menecment, beynəlxalq ticarət və logistika, nəqliyyatda servis ixtisasları üzrə ödənişli yerlərin müsabiqəsinə ümumi balı 150-dən, imtahanın ikinci mərhələsi üzrə balı 50-dən az olmayan abituriyentlər buraxılır.

Dövlət sifarişi ilə ayrılmış yerlər üzrə isə ümumi balı 200-dən, imtahanın ikinci mərhələsi üzrə balı 100-dən az olmayan abituriyentlər müsabiqədə iştirak edə bilərlər.

III ixtisas qrupu üzrə isə ümumilikdə 4 218 dövlət sifarişli plan yeri nəzərdə tutulub.

Bu qrupda ən çox dövlət sifarişli yer Hüquqşünaslıq – 600, Xarici dil müəllimliyi – 460 ixtisasları üzrə ayrılıb. Ən az dövlət sifarişli yer isə Ədəbi yaradıcılıq və ekran dramaturgiyası ixtisası üzrədir. Bu ixtisas üçün cəmi 25 dövlət sifarişli yer ayrılıb.

III ixtisas qrupu üzrə həm dövlət sifarişi, həm də ödənişli əsaslarla qəbul aparılan yerlərin müsabiqəsinə ümumi balı 200-dən, imtahanın ikinci mərhələsi üzrə balı 100-dən az olmayan abituriyentlər buraxılır.

Qeyd olunub ki, bəzi ixtisaslar üzrə qəbul tələbləri fərqlənir. Dövlət ali təhsil müəssisələrinin, ADA Universiteti istisna olmaqla, tədrisi ingilis dilində aparılan ixtisaslarının müsabiqəsində iştirak etmək üçün qəbul imtahanının birinci mərhələsində ingilis dili fənni üzrə nisbi bal 40-dan az olmamalıdır.

Həmçinin “Tərcümə (dillər üzrə)”, “Filologiya (xarici dil və ədəbiyyat üzrə)”, “Xarici dil müəllimliyi (dillər üzrə)” və “Beynəlxalq münasibətlər” ixtisaslarının müsabiqəsinə qəbul imtahanının birinci mərhələsində xarici dil fənni üzrə nisbi balı 40-dan az olmayan abituriyentlər buraxılır.

“Regionşünaslıq (regionlar üzrə)”, “Muzey, arxiv işi və abidələrin qorunması” və “Sosial iş” ixtisasları üzrə ödənişli əsaslarla ayrılmış yerlərin müsabiqəsinə ümumi balı 150-dən, imtahanın ikinci mərhələsi üzrə balı 50-dən az olmayan abituriyentlər buraxılır.

Dövlət sifarişi ilə ayrılan yerlər üzrə isə həmin ixtisaslarda ümumi balın 200-dən, ikinci mərhələ üzrə balın isə 100-dən az olmaması tələb olunur.