İyulun 12-də Samur-Abşeron kanalının Quba rayonunun Vəlvələ kəndindən keçən hissəsində batan 2010-cu il təvəllüdlü Fərid Paşa oğlu Osmanovun meyiti tapılıb.

Bu barədə Fövqəladə Hallar Nazirliyi məlumat yayıb. Bildirilib ki, nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri tərəfindən aparılan axtarış-xilasetmə əməliyyatı uğurla başa çatdırılıb.

Yeniyetmənin meyiti batdığı ərazidən təxminən 15 kilometr aralıda, Samur-Abşeron kanalının Şabran rayonunun Gəndov kəndindən keçən hissəsində aşkarlanaraq sudan çıxarılıb və aidiyyəti üzrə təhvil verilib.

Qeyd edək ki, Fərid Osmanov ailənin yeganə övladı idi. Onun anası isə gözdən əlil olduğundan övladını dünyaya gəldiyi gündən görmək imkanına malik olmayıb. Bu faciə ictimaiyyətdə dərin kədər hissi ilə qarşılanıb.