Bakının Xəzər rayonu, Buzovna qəsəbəsində dənizdə baş verən faciə zamanı bir nəfər xilas edilib, bir nəfərin meyiti tapılıb, digər şəxsin isə axtarışları davam etdirilir.

Abatv.az xəbər verir ki, bu barədə Fövqəladə Hallar Nazirliyi (FHN) məlumat yayıb.

Bildirilib ki, nazirliyin "112" qaynar telefon xəttinə Buzovna qəsəbəsində nəzarətsiz ərazidə üç nəfərin batması barədə məlumat daxil olub. Hadisə yerinə dərhal FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri cəlb olunub.

Axtarış-xilasetmə tədbirləri nəticəsində 2009-cu il təvəllüdlü A.Həmidova sudan xilas edilərək ilkin tibbi yardım göstərildikdən sonra aidiyyəti üzrə təhvil verilib.

Onun qardaşı, 2014-cü il təvəllüdlü Əli Rafiq oğlu Həmidovun meyiti sahildə aşkar edilib. Digər qardaşı – 2004-cü il təvəllüdlü Ruslan Rafiq oğlu Həmidovun axtarışları isə davam etdirilir.

FHN-in əməkdaşı Fərid İlhamoğlu bildirib ki, hadisənin baş verdiyi ərazi əvvəllər də təhlükəli zona kimi qeydə alınıb. Onun sözlərinə görə, Buzovna ilə yanaşı Mərdəkan-Şüvəlan istiqamətində yerləşən "Şimal" DRES, "Milqaya", Bilgəh qəsəbəsi, Nardaranın 12-ci dalanı və "Daçnik", Novxanının Sarıqaya ərazisi, eləcə də Sahil qəsəbəsindəki "Mayak" adlanan ərazilər dənizdə çimmək üçün ən riskli məkanlar hesab olunur.

Nazirlik vətəndaşlara yalnız nəzarət olunan çimərliklərdən istifadə etməyi, qayalıq və təhlükəli sahələrdə dənizə daxil olmamağı tövsiyə edib.