Tərtər şəhərində fərdi yaşayış evində baş vermiş və ilkin olaraq yanğın hadisəsi kimi qeydə alınan faciənin əslində xüsusi amansızlıqla törədilmiş ağır cinayət olduğu müəyyən edilib.

Abatv.az xəbər verir ki, bu barədə Baş Prokurorluğun Mətbuat Xidməti məlumat yayıb.

Bildirilib ki, 2026-cı il avqustun 6-da Tərtər şəhəri, Nəriman Nərimanov küçəsi, ev 38 ünvanında yerləşən fərdi yaşayış evində yanğın baş verməsi barədə məlumat daxil olub. Hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin əməkdaşları cəlb olunaraq yanğın söndürülüb.

Yanğın söndürüldükdən sonra evə baxış keçirilərkən burada yaşayan 1941-ci il təvəllüdlü Əsgər Vəli oğlu Səmədov və həyat yoldaşı, 1954-cü il təvəllüdlü Adilə Soltan qızı Hüseynovanın meyitləri aşkar edilib.

Faktla bağlı Tərtər Rayon Prokurorluğunda cinayət işi başlanılıb. Daha sonra Baş Prokurorluğun Kriminalistika və İnformasiya Texnologiyaları İdarəsinin prokuror-kriminalistləri, Fövqəladə Hallar Nazirliyinin Əməliyyat-İstintaq İdarəsinin müstəntiqləri, rayon prokurorluğu və polis əməkdaşları, eləcə də Ədliyyə Nazirliyinin Məhkəmə Ekspertizası Mərkəzinin ekspertlərinin iştirakı ilə genişmiqyaslı istintaq və əməliyyat-axtarış tədbirləri həyata keçirilib.

İstintaq zamanı hadisə yerindən maddi sübutlar toplanılıb, zəruri ekspertizalar təyin olunub, çoxsaylı şəxslər dindirilib və əldə olunan məlumatlar əsasında yanğının təsadüfi baş vermədiyi müəyyən edilib.

Araşdırmalar nəticəsində məlum olub ki, hadisə oğurluq məqsədilə törədilmiş qətlin izlərini gizlətmək üçün planlaşdırılıb. İbtidai istintaqla müəyyən edilib ki, 1987-ci il təvəllüdlü Vüqar Mehman oğlu Baxşəliyev avqustun 6-da yaşlı ər-arvadın yaşadığı evə daxil olaraq külli miqdarda pul vəsaitini ələ keçirib. Daha sonra cinayətin izlərini gizlətmək məqsədilə evi yandıraraq Əsgər Səmədov və Adilə Hüseynovanı qəsdən öldürüb.

Hadisə ilə bağlı yayılan ilkin məlumatlara görə, evdən təxminən 15 min manat pul oğurlanıb. Mərhumların oğlunun sözlərinə əsasən, həmin vəsait evdə saxlanılırmış.

Toplanmış sübutlar əsasında Vüqar Baxşəliyevin əməli Azərbaycan Respublikası Cinayət Məcəlləsinin 120.2.4-cü (ümumi təhlükəli üsulla adam öldürmə), 120.2.5-ci (tamah məqsədilə adam öldürmə), 120.2.6-cı (başqa cinayəti gizlətmək məqsədilə adam öldürmə) və 120.2.7-ci (iki şəxsi öldürmə) maddələri ilə tövsif olunub. O, prokurorluq tərəfindən şübhəli şəxs qismində tutulub.

Hazırda cinayət işi üzrə istintaq Baş Prokurorluğun Kriminalistika və İnformasiya Texnologiyaları İdarəsində davam etdirilir.

Hüquq-mühafizə orqanları cinayətin bütün halları, motivi və baş verməsinə şərait yaradan amillərin tam və obyektiv araşdırılması istiqamətində zəruri prosessual tədbirləri davam etdirirlər.