Azərbaycan Prezidenti İlham Əliyevin Naxçıvana son səfəri zamanı verdiyi əsas mesajlardan biri TRIPP marşrutunun açılmasına start verilməsi ilə bağlıdır.

Abatv.az xəbər verir ki, bunu Milli Məclisin deputatı Hikmət Babaoğlu açıqlamasında bildirib.

 

Deputat qeyd edib ki, Azərbaycanın nəqliyyat kommunikasiyaları vasitəsilə Naxçıvanla birləşməsi muxtar respublikanın son 35 illik blokadasının, daha geniş tarixi müstəvidə isə təxminən bir əsrlik yarımblokadasının başa çatması deməkdir.

Hikmət Babaoğlunun sözlərinə görə, Naxçıvanın Azərbaycanın əsas ərazisindən ayrı düşməsinin əsas səbəblərindən biri Qərbi Zəngəzurun Ermənistana verilməsi olub. Deputat Naxçıvanın Türkiyə və İranla sərhədləri, eləcə də Ermənistan istiqamətində strateji mövqeyinin onun geosiyasi əhəmiyyətini daha da artırdığını vurğulayıb.

“Naxçıvanın bu mühüm üstünlüklərini nəzərə alan imperialistlər vaxtilə Naxçıvanı Azərbaycandan quru sərhədlərlə ayırmışdılar. Bu gün isə güclü Azərbaycan bunu bərpa edir”, – deyə deputat bildirib.

H.Babaoğlu Prezident İlham Əliyevin Naxçıvana 17-ci səfərinin Azərbaycanla Naxçıvan arasında kommunikasiyaların bərpasının başlanğıcı kimi qiymətləndirilə biləcəyini deyib.

Deputat son illərdə Naxçıvanda həyata keçirilən infrastruktur və sosial-iqtisadi layihələrin də muxtar respublikanın inkişafında mühüm rol oynadığını qeyd edib. Onun sözlərinə görə, enerji təminatının gücləndirilməsi, sənaye və aqrosənaye müəssisələrinin yaradılması Naxçıvanın iqtisadi imkanlarını əhəmiyyətli dərəcədə artırıb.

Hikmət Babaoğlu bildirib ki, Naxçıvan hazırda inkişafının yeni mərhələsinə qədəm qoyur. Prezident İlham Əliyevin Naxçıvan Sənaye Parkının əsasını qoyması və hidroenerji qurğularının yaradılmasına start verilməsi bu prosesin mühüm istiqamətlərindəndir.

 

Deputatın fikrincə, Naxçıvanın gələcəkdə yalnız regional nəqliyyat və logistika mərkəzi deyil, qlobal əhəmiyyətli geoiqtisadi məkan kimi formalaşması mümkündür.

O qeyd edib ki, Naxçıvanın Avropa ilə Asiya arasında mühüm kommunikasiya xəttinə qoşulması onun strateji əhəmiyyətini daha da artıracaq:

“Əlbəttə, biz bu hadisəni sadəcə regional hadisə kimi qiymətləndirə bilmərik. Çünki dünya iqtisadiyyatının da, dünya siyasətinin də nəbzi Qlobal Cənub və Qlobal Qərb arasında atır. Naxçıvan da bu coğrafiyanın tam ortasındadır”.

H.Babaoğlu Azərbaycanın əsas hissəsi ilə Naxçıvan arasında nəqliyyat bağlantısının bərpasının ölkənin Şərq-Qərb və Şimal-Cənub nəqliyyat dəhlizlərindəki mövqeyini də gücləndirəcəyini bildirib.

Onun sözlərinə görə, Naxçıvandan İran istiqamətində yeni dəmir yolu xəttinin inşası və mövcud Culfadan keçən dəmir yolu bağlantısının inkişaf etdirilməsi Şimal-Cənub nəqliyyat marşrutunun mühüm seqmentlərindən birinə çevrilə bilər.

Deputat Şərq-Qərb istiqamətində isə Naxçıvandan böyük həcmdə yükdaşımaların həyata keçirilməsinin yeni iqtisadi imkanlar yaradacağını vurğulayıb. O hesab edir ki, bunun ətrafında logistika, ticarət, turizm və xidmət sektorlarının inkişafı üçün geniş imkanlar formalaşacaq.

Hikmət Babaoğlu Naxçıvanın Türkiyə, İran və Ermənistanla sərhəddə yerləşməsinin onun regional ticarət və kommunikasiya sistemində rolunu artırdığını da qeyd edib.

Deputat Naxçıvanın yalnız nəqliyyat qovşağı deyil, Azərbaycan mədəniyyətinin mühüm tarixi mərkəzlərindən biri olduğunu bildirib və gələcək kommunikasiyaların bu tarixi və mədəni əlaqələrin yeni mərhələdə inkişafına xidmət edəcəyini vurğulayıb.

Sonda H.Babaoğlu Naxçıvanın artan iqtisadi və logistika əhəmiyyətinin onun təhlükəsizliyi məsələsini də xüsusi aktuallaşdırdığını bildirib. Deputat Prezident İlham Əliyevin Naxçıvanda Əlahiddə Ümumqoşun Ordusunun qərargahında keçirdiyi görüşün də mühüm mesaj daşıdığını qeyd edib.

Onun sözlərinə görə, Azərbaycanın Naxçıvanın təhlükəsizliyini təmin etmək üçün güclü hərbi potensialının olması muxtar respublikanın yeni geosiyasi və geoiqtisadi mərhələdə inkişafının əsas təminatlarından biridir.