Milli Məclisin sədri Sahibə Qafarova Qırğız Respublikasına səfəri çərçivəsində bu ölkənin parlamentinin – Joqorku Keneşin sədri Marlen Mamatalıyev ilə görüşüb.

Abatv.az xəbər verir ki, görüşdə Azərbaycan və Qırğızıstan arasında mövcud olan yüksək səviyyəli münasibətlər, xalqlarımızı birləşdirən tarixi-mədəni və mənəvi bağlar, eləcə də parlamentlərarası əməkdaşlığın inkişaf perspektivləri müzakirə olunub.

Tərəflər Azərbaycan-Qırğızıstan münasibətlərinin qardaşlıq və müttəfiqlik prinsipləri əsasında inkişaf etməsindən məmnunluqlarını ifadə ediblər. Söhbət zamanı Azərbaycan Prezidenti İlham Əliyevin Qırğızıstana son dövlət səfərinin ikitərəfli əlaqələrin möhkəmlənməsində və münasibətlərin müttəfiqlik səviyyəsinə yüksəlməsində mühüm rol oynadığı vurğulanıb.

Görüşdə humanitar sahədə əməkdaşlığın əhəmiyyətinə də toxunulub. Marlen Mamatalıyev Ağdam rayonunun Xıdırlı kəndində Qırğızıstan xalqının hədiyyəsi olan orta məktəbin, eləcə də Bişkekdə Heydər Əliyev adına məktəb-gimnaziya kompleksinin və Nizami Gəncəvi adına məktəbin xalqlarımız arasındakı dostluq və qardaşlığın rəmzi olduğunu bildirib. O, Bakıda görkəmli qırğız yazıçısı Çingiz Aytmatovun abidəsinin ucaldılmasını da onun xatirəsinə göstərilən ehtiramın ifadəsi kimi dəyərləndirib.

Sahibə Qafarova xalqlarımızı birləşdirən ortaq tarixi, mədəni və mənəvi köklərin ikitərəfli münasibətlərin inkişafında mühüm əhəmiyyət daşıdığını qeyd edib. O, parlamentlərarası əlaqələrin mövcud əməkdaşlığın daha da dərinləşdirilməsinə verdiyi töhfəni diqqətə çatdırıb.

Tərəflər parlament komitələri və dostluq qrupları arasında əlaqələrin genişləndirilməsinin, həmçinin Türkdilli Ölkələrin Parlament Assambleyası (TÜRKPA) çərçivəsində əməkdaşlığın gücləndirilməsinin vacibliyini vurğulayıblar. Türk dövlətləri arasında parlamentlərarası təmasların artırılmasının regional əməkdaşlığın inkişafına xidmət etdiyi bildirilib.

Görüşdə beynəlxalq təşkilatlar çərçivəsində qarşılıqlı dəstəyin əhəmiyyəti də qeyd olunub. Tərəflər mövcud əməkdaşlığın gələcəkdə də davam etdirilməsinə və Azərbaycan-Qırğızıstan münasibətlərinin bütün istiqamətlər üzrə daha da möhkəmləndirilməsinə əminlik ifadə ediblər.

Sonda parlamentlərarası əməkdaşlığın genişləndirilməsi ilə bağlı fikir mübadiləsi aparılıb və bir sıra məsələlər üzrə ortaq mövqe ifadə olunub.