Dövlət hakimiyyətinin zorla ələ keçirilməsinə, konstitusiya quruluşunun zorakılıq yolu ilə dəyişdirilməsinə və dini zəmində nifrət və düşmənçiliyin qızışdırılmasına yönəlmiş çağırışlarla bağlı cinayət işi üzrə daha 7 nəfər beynəlxalq axtarışa verilib.

Abatv.az xəbər verir ki, bu barədə Azərbaycan Respublikası Baş Prokurorluğunun mətbuat xidməti məlumat yayıb.

Məlumata görə, cinayət işi üzrə ibtidai istintaq davam etdirilir. Araşdırma zamanı Türkiyədə yaşayan və fəaliyyət göstərən bir sıra şəxslərin sosial şəbəkələr və müxtəlif internet platformaları vasitəsilə Azərbaycan Respublikasının konstitusiya quruluşunun zorla dəyişdirilməsinə, dövlət hakimiyyətinin zorla ələ keçirilməsinə, habelə dini radikalizm zəminində zorakılığa, dini nifrət və düşmənçiliyin qızışdırılmasına yönəlmiş materiallar hazırlayaraq yaymalarına dair əsaslı şübhələr müəyyən edilib.

İstintaq materiallarında qeyd olunur ki, araşdırılan çıxış və paylaşımların məzmunu, onların yayılma üsulları, auditoriyası və ictimaiyyətə çatdırılma şəraiti hüquqi baxımdan qiymətləndirilib.

Baş Prokurorluğun məlumatına əsasən, beynəlxalq axtarışa verilən şəxslər aşağıdakılardır:

- Rıdvan Kaya — 1961-ci il təvəllüdlü, “Haksöz” jurnalı və “Haksöz Haber” internet resursunda müəllif;

- Zekeriyya Ceran — 1981-ci il təvəllüdlü, Abdullah İmamoğlu adı ilə tanınan, “Köklü Değişim” nəşrində yazıçı və “Değişim TV”nin aparıcısı;

- Fatih Tezcan — 1976-cı il təvəllüdlü, “Analiz Merkezi” internet resursunun təsisçisi və proqram müəllifi;

- Ahmet Şanlı — 1971-ci il təvəllüdlü, “Ahmet Şanlı Hukuk Bürosu”nun rəhbəri;

- Fahrettin Taşkaya Saral — 1971-ci il təvəllüdlü, araşdırmaçı;

- Abdurrahman Tumer — 1975-ci il təvəllüdlü, “Facebook” sosial şəbəkəsində müvafiq profili olan şəxs;

- Alparslan Tanrıkulu — moderator və idmançı kimi fəaliyyət göstərən şəxs.

İstintaqın ilkin nəticələrinə əsasən, həmin şəxslərin 25 sentyabr–18 oktyabr 2026-cı il tarixlərində “X”, “Facebook”, “Instagram”, “YouTube”, “TikTok” və digər internet resurslarında yaydıqları materiallarda qanunla nəzərdə tutulan cinayət əlamətlərinin olduğu ehtimal edilir.

Məlumatda, həmçinin Rıdvan Kayanın 3 oktyabr 2026-cı ildə Azərbaycanın İstanbul şəhərindəki baş konsulluğunun qarşısında keçirilən aksiyada, Rıdvan Kaya və Zekeriyya Ceranın isə 13 oktyabrda Azərbaycanın Ankaradakı səfirliyinin qarşısında təşkil olunan aksiyada hakimiyyətin zorla ələ keçirilməsinə dair çağırışlar etdikləri və dini radikalizm məzmunlu çıxışlar səsləndirdikləri bildirilir.

Barələrində həbs qətimkan tədbiri qiyabi qaydada seçilib

Baş Prokurorluğun məlumatına görə, 19 oktyabr 2026-cı ildə həmin 7 nəfər Cinayət Məcəlləsinin 281.2, 283.2.1 və 167-3.1-ci maddələrində nəzərdə tutulan əməlləri törətməkdə təqsirləndirilən şəxs qismində cəlb edilib.

İstintaq orqanının vəsatətləri və prosessual rəhbərliyi həyata keçirən prokurorun təqdimatları əsasında Bakı şəhəri Binəqədi Rayon Məhkəməsinin qərarları ilə onların barəsində həbs qətimkan tədbiri qiyabi qaydada seçilib və beynəlxalq axtarış elan olunub.

Hazırda cinayət işi üzrə araşdırmalar davam edir. Təqsirləndirilən şəxslərə aid edilən əməllərin bütün hallarının müəyyənləşdirilməsi, elektron sübutların toplanması və yoxlanılması, materialların müəllifliyinin araşdırılması istiqamətində zəruri istintaq hərəkətləri həyata keçirilir.

Bununla yanaşı, iş üzrə hüquqi prosedurların təmin edilməsi məqsədilə beynəlxalq hüquqi yardım və əməkdaşlıq mexanizmlərindən istifadə olunur, Türkiyənin və digər tərəfdaş dövlətlərin aidiyyəti qurumları ilə qarşılıqlı fəaliyyət göstərilir.

Baş Prokurorluq vurğulayıb ki, Azərbaycan Respublikasının Konstitusiyası ilə vicdan və dini etiqad, fikir və söz azadlığı, eləcə də qanuni vasitələrlə ictimai-siyasi mövqeyini ifadə etmək hüququ təmin edilir. Bununla belə, həmin hüquq və azadlıqlar dövlət hakimiyyətinin zorla ələ keçirilməsinə, konstitusiya quruluşunun zorakılıq yolu ilə dəyişdirilməsinə və dini nifrət və düşmənçiliyin qızışdırılmasına yönəlmiş çağırışlara hüquqi əsas yaratmır.

Qeyd olunub ki, bu xarakterli qanunazidd əməllərlə bağlı şəxslərin vətəndaşlığından, yaşadıqları ölkədən və istifadə etdikləri informasiya platformasından asılı olmayaraq, qanunvericilikdə nəzərdə tutulan tədbirlər görüləcək.

Cinayət işi üzrə ibtidai istintaq davam etdirilir.