Milli Hidrometeorologiya Xidmətinin proqnozuna əsasən, qarşıdan gələn şənbə və bazar günləri ölkə ərazisində havanın temperaturunun yüksələrək bəzi bölgələrdə 41 dərəcəyədək çatacağı gözlənilir.

AbaTV.az xəbər verir ki, bununla bağlı Fövqəladə Hallar Nazirliyi (FHN) əhaliyə müraciət edib.

Nazirlik bildirib ki, yüksək temperatur yanğın riskini əhəmiyyətli dərəcədə artırır. Xüsusilə açıq ərazilərdə, əkin sahələrində, meşə massivlərində və yaşayış məntəqələrində kiçik ehtiyatsızlıq belə ciddi yanğınlarla nəticələnə bilər.

FHN, həmçinin isti hava şəraiti ilə əlaqədar kondisioner və digər elektrik cihazlarından istifadənin artmasının elektrik şəbəkələrində yüklənməyə, nəticədə isə qısaqapanma və yanğın təhlükəsinə səbəb ola biləcəyini vurğulayıb.

Nazirlik vətəndaşlara evlərdə və iş yerlərində elektrik şəbəkəsini normadan artıq yükləməməyi, nasaz elektrik avadanlıqlarını vaxtında təmir etdirməyi, açıq oddan ehtiyatla istifadə etməyi, siqaret kötüklərini və kibriti söndürmədən ətrafa atmamağı tövsiyə edib.

Bundan başqa, meşə və yaşıllıq ərazilərində istirahət edən şəxslərə yalnız xüsusi ayrılmış yerlərdə ocaq qalamaq, ocağı nəzarətsiz qoymamaq və ərazini tərk edərkən tam söndürmək tapşırılıb. Küləkli hava şəraitində isə ocaq qalamağın qadağan olunduğu bir daha xatırladılıb.

FHN əhalini yanğın təhlükəsizliyi qaydalarına ciddi əməl etməyə və hər hansı fövqəladə hadisə baş verdikdə dərhal aidiyyəti qurumlara məlumat verməyə çağırıb.