Dövlət İmtahan Mərkəzi (DİM) magistratura səviyyəsinə qəbul üzrə ixtisaslaşma seçiminin müddətinin uzadıldığını açıqlayıb.

DİM-in məlumatına görə, müsabiqə şərtlərini ödəyən və ixtisaslaşma seçimində iştirak etmək hüququ qazanan bakalavrlar 27 iyul saat 13:00-dək internet vasitəsilə ixtisaslaşma seçimini edə bilərlər.

Qeyd olunub ki, 27 iyul saat 09:15-ə olan məlumata əsasən, ümumilikdə 15 633 bakalavr elektron ərizəsini təsdiqləyib. Onlardan 14 251 nəfəri Azərbaycan, 1 382 nəfəri isə rus bölməsi üzrə təhsil alan məzunlardır.

Bakalavrlar ixtisaslarına uyğun olmaq şərti ilə 20-dək ixtisaslaşma seçərək "Bakalavrın elektron ixtisaslaşma seçimi ərizəsi"nə istədikləri ardıcıllıqla daxil edib təsdiqləməlidirlər. Seçilən ixtisaslaşmalar məzunun bitirdiyi bakalavr ixtisasına, bəzi hallarda isə tələb olunan xarici dil şərtlərinə uyğun olmalıdır.

DİM xatırladıb ki, qəbul aparılan ixtisaslaşmalar və ayrılan plan yerləri barədə ətraflı məlumat "Magistr" jurnalının 4-cü nömrəsində yer alıb. Jurnalın elektron versiyası abiturient.az portalında mövcuddur.

Bildirilib ki, müsabiqədə yalnız elektron ixtisaslaşma seçimi ərizəsini dolduraraq təsdiqləmiş bakalavrlar iştirak edə biləcəklər.