Azərbaycanda yaş məhdudiyyəti tətbiq edilən sosial şəbəkə platformalarının fəaliyyəti ilə bağlı tələblərin pozulmasına görə inzibati cərimələr müəyyən edilib.

Abatv.az xəbər verir ki, bununla bağlı Prezident İlham Əliyev İnzibati Xətalar Məcəlləsinə, "İnformasiya, informasiyalaşdırma və informasiyanın mühafizəsi haqqında" və "Uşaqların zərərli informasiyadan qorunması haqqında" qanunlara dəyişiklikləri təsdiqləyib.

Yeni dəyişikliklərə əsasən, yaş məhdudiyyəti tətbiq edilən sosial şəbəkə platformaları tərəfindən tələb olunan məlumatların vaxtında təqdim edilməməsinə, natamam və ya təhrif olunmuş məlumat verilməsinə görə vəzifəli şəxslər 6 000–7 000 manat, hüquqi şəxslər isə 15 000–20 000 manat məbləğində cərimə olunacaqlar.

Həmçinin, müvafiq dövlət qurumunun göndərdiyi sorğuların 5 iş günü ərzində cavablandırılmaması və ya yanlış məlumat təqdim edilməsi hallarında vəzifəli şəxslər 7 000–8 000 manat, hüquqi şəxslər isə 25 000–30 000 manat cərimə ediləcəklər.

Qanuna əsasən, fərdi rəqəmsal hesabların yaradılması zamanı yaşın yoxlanılması mexanizmlərinin tətbiq edilməməsi, 16–18 yaş arası istifadəçilərin təhlükəsizliyinin təmin olunmaması, zərərli məzmunun vaxtında aradan qaldırılmaması, şəxsi məlumatların qanunsuz istifadəsi və ya silinməsi ilə bağlı tələblərin pozulmasına görə vəzifəli şəxslər 8 000–9 000 manat, hüquqi şəxslər isə 35 000–40 000 manat məbləğində cərimələnəcəklər.

Eyni pozuntuların bir il ərzində təkrar törədilməsi halında vəzifəli şəxslər üçün cərimə 9 000–10 000 manata, hüquqi şəxslər üçün isə 45 000–50 000 manata qədər artırılacaq.

Qeyd edilib ki, qanun rəsmi dərc edildiyi gündən 12 ay sonra qüvvəyə minəcək.

Prezidentin imzaladığı Fərmana əsasən, Rəqəmsal İnkişaf və Nəqliyyat Nazirliyi yaş məhdudiyyəti tətbiq ediləcək sosial şəbəkə platformalarının siyahısını 5 ay müddətində hazırlayıb təsdiq etməli və bu barədə dövlət başçısına məlumat verməlidir.