Bakıda keçiriləcək beynəlxalq səviyyəli “Alufar IRONMAN 70.3 Baku” yarışının təhlükəsiz və yüksək səviyyədə təşkili məqsədilə şəhərin bəzi küçə və prospektlərində nəqliyyatın hərəkətinə müvəqqəti məhdudiyyətlər tətbiq olunacaq.

Məhdudiyyətlər sentyabrın 4-də saat 21:00-dan etibarən mərhələli şəkildə qüvvəyə minəcək və sentyabrın 5-də saat 16:00-dək davam edəcək.

Yarışın keçirilməsi ilə əlaqədar müəyyən istiqamətlər üzrə nəqliyyat vasitələrinin hərəkətinin məhdudlaşdırılması nəzərdə tutulur.

Sürücülərə və şəhər sakinlərinə səfərlərini əvvəlcədən planlaşdırmaları, mümkün olduğu təqdirdə alternativ marşrutlardan istifadə etmələri və yollarda tətbiq ediləcək müvəqqəti məhdudiyyətləri nəzərə almaları tövsiyə olunur.

Qeyd edək ki, “Alufar IRONMAN 70.3 Baku” beynəlxalq səviyyəli idman yarışlarından biri olmaqla, paytaxtda çoxsaylı iştirakçı və tamaşaçının bir araya gəlməsinə səbəb olacaq.