Türkiyədə 15 iyul 2016-cı il tarixində FETÖ silahlı terror təşkilatının həyata keçirdiyi dövlət çevrilişi cəhdi zamanı Prezident Rəcəb Tayyib Ərdoğana qarşı sui-qəsd planında iştirak etdiyi bildirilən sonuncu qaçaq şübhəli saxlanılıb.

Məlumata görə, Muğla vilayətinin Marmaris şəhərində Prezident Ərdoğanın qaldığı oteli hədəf alan 37 nəfərlik qrupun üzvü olduğu bildirilən pilot kapitan B.K. hüquq-mühafizə orqanları tərəfindən keçirilən əməliyyat nəticəsində ələ keçirilib.

Bildirilir ki, B.K. uzun müddət axtarışda olub və hadisə ilə bağlı saxlanılmayan sonuncu şübhəli hesab edilirdi.

Qeyd edək ki, 15 iyul 2016-cı ildə Türkiyədə FETÖ tərəfindən təşkil olunduğu bildirilən dövlət çevrilişi cəhdi zamanı yüzlərlə insan həlak olub və yaralanıb. Həmin hadisələr zamanı Prezident Rəcəb Tayyib Ərdoğanın Marmarisdə qaldığı otel də silahlı qrupun hədəfinə çevrilmişdi.