Göyçay rayonunda Şirvan suvarma kanalının yarılması nəticəsində su ətraf ərazilərə yayılıb.

Hadisə kanalın rayonun Şahədət Qarabağlar kəndi ərazisindən keçən hissəsində qeydə alınıb. Kanalda yaranan yarıq səbəbindən su yaxınlıqda yerləşən və yerli sakinlərin "qobu" adlandırdığı dərin çökəkliyə doğru axmağa başlayıb.

Məlumata görə, hadisə yerinə aidiyyəti dövlət qurumlarının əməkdaşları və xüsusi texnikaları cəlb olunub. Hazırda qəzanın nəticələrinin aradan qaldırılması, kanalın bərpası və su axınının dayandırılması istiqamətində təxirəsalınmaz tədbirlər həyata keçirilir.

Ərazidə təhlükəsizliyin təmin edilməsi məqsədilə Rayon Polis Şöbəsinin əməkdaşları da xidmət aparırlar.

Hadisənin səbəbləri araşdırılır.